Problemanan relaciona cu trahadornan y cambio di ley 

ORANJESTAD – Lider di Fraccion di MEP Evelyn Wever-Croes y parlamentario Ady Thijsen a reuni cu presidente di sindicato FTA sr. Hubert Dirksz y abogado Figaroa.
Topico tabata e diferente desafionan cu tin pa e clase trahador. Y naturalmente a toca e tema di e cambio di ley cu gobierno kier a introdusi den articulo 1613x y asina laga e trahador desampara.

“Den esey nos tabata hopi cla cu e sindicato. E articulo aki a wordo introdusi den anja 1992. E tempo ey e minister encarga cu labor tabata sr Freddi Refunjol y e minister encarga cu husticia tabata sr Hendrik Croes. Nan a bin cu e ley ey pasobra den e programa di partido MEP den eleccion na anja 1989 esey tabata un di e compromisonan di MEP, pa brinda e clase trahador mas proteccion, pa cual a haya sosten abrumador.

Desde e tempo ey caba gobierno di MEP a duna di conose na mundo henter cu aki na Aruba nos ta respeta clase trahador y nos ta duna clase trahador proteccion. Tur esnan cu kier a bin establese nan mes na Aruba tabata sa cu esey ta nos standard, y nada a cambia den esey. Pues ningun gobierno tin e derecho pa torno na proteccion di trahadornan awor.

Un donjo di trabou cu awor kier kita un trahador cu NO ta funciona, por hasi esey caba cu e leynan existente. E mester djis cana e caminda legal. Un donjo di trabou cu awor kier kita un trahador cu SI ta funciona, no por hasi esey y no ta suppose di por hasi esey tampoco. Wel, esey ta locual cu minister Paul Croes kier a hasi. Nos ta contra esey.

E argumentonan cu gobierno a duna tampoco ta convense nos, pasobra sin un maneho concreto pa brinda trabou na hobennan y senioren, bo lo no logra esaki ni si bo cambia e ley.
Ademas, e cambio di ley no ta crea mas cupo di trabou, e ta brinda talves mas oportunidad di empleo despues cu kita otro hende for di trabou. Pues ta un tipo di stoelen dans ta bai tin.
Y finalmente mi ta referi na locual e experto di IMF sr. Debrun a trese padilanti durante e evento annual di Camara di Comercio, cu pa un flexibilisacion di mercado laboral ta exitoso, gobierno mester por brinda cierto garantianan, y ela menciona como ehempel, un seguro contra desempleo. Aruba no ta asina leew ainda.

Pa e motibonan aki, y mucho mas, MEP ta contra e cambio di ley y lo no permiti ningun gobierno torno na derecho di trahador”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co