ORANJESTAD - Nos a tuma nota cu Minister di labor a pospone e intentonan relaciona cu eliminacion di art 1613x y nos ta masha contento cu e minister a recapacita su decicion descabeya di elimina e proteccion pa trahadornan especialmente den e tempo dificil aki sin cu tin ningun motibo pa hasi tal. Pasobra manera nos a enfatisa na mas di un ocasion un donjo di trabou cu kier kita un trahador cu no ta funciona, por hasie awor caba. No mester cambia ley pa esey. Sinembargo, si un donjo di trabou kier kita un trahador cu ta funciona masha bon, e no por hasi esey zomaar y no ta suppose di por hasi esey tampoco! Ademas tur e otro argumentonan cu e minister a usa pa elimina e ley 1613x, e por logra su meta na otro forma sin mester laga henter e clase trahador desampara. 
Loke si ta eroneo den su comunicado ta e impreshon cu e kier laga crea cu ta fraccion di AVP a lag'e realisa pa no continua cu e proceso. Siendo cu e motibo principal ta pasobra nunca Minister Croes tawatin argumentonan solido y tampoco sosten di pueblo. Ta danki na e presion cu sindicatonan a eherse, e minister mester a sucumbi. 

Banda di argumentonan treci dilanti door di gremionan sindical nos di oposicion tambe a vocifera nos pensamento y a splica nos motibonan pa refuta e intencion di eliminacion di art 1613x. E esencia di e ley tawata hustamente pa brinda e clase trahador mas proteccion, cual a haya sosten abrumador ora esaki a wordo introduci na 1992 door di MEP. Actualmente manera cu e ley ta un donjo di trabou cu kier kita un trahador cu NO ta funciona, por hasi esey caba cu e leynan existente. E mester djis cana e caminda legal. Un donjo di trabou cu awor kier kita un trahador cu SI ta funciona, no por hasi esey y no ta suppose di por hasi esey tampoco. Ademas eliminacion di articulo 1613x lo a hasie mas facil pa abusonan na pia di trabou escala pasobra e trahador ta na merced di e dunador di trabou. Otro motibo tambe ta e hecho cu e lo stroba e trahador crece financieramente y pa e inverti den por ehempel un cas. Cu eliminacion di e articulo aki parti di su stabilidad financiero lo a cai na awa. Pues ningun gobierno tin e derecho pa torno na proteccion di trahadornan. Si pueblo realisa bon Paul Croes nunca tawatin motibo di peso pa eliminacion di art 1613x.

Basa riba e puntonan aki y mucho mas loke a wordo treci padilanti door di sindicatonan MEP nunca lo apoya e cambio di ley pasobra lo no permiti ningun gobierno torno na derecho y proteccion di trahador.

Expresionnan haci den e articulo aki no necesariamente ta refleha opinion di ArenaPoliti.co