Recientemente Rene Herde a publica un articulo den cual e ta acusa MEP di ta malinforma e pueblo relaciona cu e articulo cu AVP kier elimina for di Codigo Civil, esta e articulo 1613 X den cual e kier kita tur e derechonan di nos obreronan. Y segun sr. Herde pa tal motibo el a ricibi menasanan riba su celular, tambe cu doñonan di trabao a ricibi menasa di sindicalistanan y cu trahadornan a yama doñonan di trabao pa sinberguensa. Un mensahe na sr. Herde: Abo no tin berguensa pa skirbi un articulo asina? Sr. Baba Herde tin un titulo cu e ta carga y ariba dje ta skirbi un articulo asina mediocre?

Pakico pueblo no ta kere AVP mas?
Pueblo di Aruba ta fada caba cu boso mentiranan. Boso a priminti y boso di AVP no a cumpli. E articulo di Baba Herde ta mustra claramente cu e no tin argumento mas pa purba manipula cu mentira pa nan logra nan meta di sigui duna nan compinchinan cu a hinca placa den nan campaña miyonario y awor ta exigi bek, esaki ta loke e ley ta encera.

Denuncia of manipulacion cu mentira?
Ridiculez ora un persona manera sr. Herde ta skirbi of papia e sorto di cosnan aki! Baba, abo no tabata sa cu ora bo ricibi un menasa, sea verbalmente, fisicamente, riba rednan social of di cualkier indole, bo deber ta pa denuncia e persona of personanan aki na autoridadnan hudicial? Si bo no sa esaki, bo por haci’e ainda y bay Ministerio Publico!

Baba ta ataca e pueblo trahado
Den e articulo aki cu sr. Herde ta expresa claramente cu e no tin e pueblo na pecho, e no tin ningun interes pa cu e pueblo, solamente cu e interes di sigui mata e homber chikito. Pa ataca e sindicalistanan, pa bay contra tur respet di nos hende muher y hombernan balente cu merece proteccion y siguransa di trabao y beneficio pa nan famia, nan yiunan y yiu di nan yiunan. Acaso Sr. Herde, abo no tin ningun sentimento pa e pueblo Arubano y ta pensa solamente riba bo propio bienestar?

No tira culpa riba MEP
Ta MEP a bin cu e  ley 1613X na 1992 y tempo di ex-Minister Ramon Lee di MEP el a para fuerte pa sali na defensa di nos obreronan. Hecho ta cu boso di AVP a bin cu e idea pa elimina e ley aki bao maneho di Minister Paul Croes. Manera e dicho ta bisa, No frega bo lomba sushi contra muraya limpi, es decir no bin acusa MEP di mal trabao cu boso ta haci. Si enberdad ta MEP ta esun cu ta informa e pueblo robes, wel wel sr. Herde, mi ta reta bo bay radio y splica pueblo kico ta boso plan macabro contra e pueblo trahado Arubano.

Pueblo, keda alerta!
E strategia aki di sr. Herde ta pa pasa como e victima y pa nan pasa e ley aki pa kita e articulo 1613x, cu ta kita tur bo derechonan y proteccion como obrero y tur esaki ta pa nan pasa e ley aki durante temporada di Pasco. Ora cu nos tur ta celebra e nacemento di nos Niño Hesus nan ta bay pasa e ley aki. Pueblo, keda alerta pasobara e gobierno di AVP aki kier caba cu cada un di nos y haci e pueblo mas pober pa nos mendiga tras di nan y mientras nan si ta keda bon para cu placa di pueblo. Hamas MEP lo permiti e eliminacion di e ley aki cu ta proteccion di nos obreronan. Hamas, pasobra Solo ta sali pa nos tur!

Expresionnan haci den e articulo aki no necesariamente ta refleha opinion di ArenaPoliti.co