Parlamentario Besaril (MEP):

"Pabien na Cuerpo Policial ....

Apesar di scarsedad na material y presupuesto nos Cuerpo Policial ta profesional y dedica!"

Den conferencia di prensa semanal di partido MEP, Parlamentario Guillfred Besaril a elabora riba e ultimo desaroyo den criminalidad na Aruba. EParlamentario a cuminsa na felicita Cuero Policial pa e accion cu tabatin Dialuna madruga caminda a detene 3 individuo sospecha di a atraca Excelsior Casino:

“Danki na e homber y muhenan balente den KPA, cu awe nos por ta trankilo cu e malhechornan aki ta tras di tralie. Aunke e investigacion ta andando ainda, fuentenan oficial a confirma cu e individuonan deteni posiblemente ta esnan cu a comete e atraco riba e Casino. E accion aki di KPA ta e prueba palbabel, cu aunke Cuerpo Policial tin scarsedad na material y presupuesto pa traha cun’e, nan ta un Cuerpo profesional y dedica na nan trabou!

Fraccion di MEP na varios ocasion a vocifera e preocupacion relaciona cu e actividadnan criminal cu a lanta cabes di forma desproporcional ultimo tempo. Specialmente e tipo di sucesonan manera e atraco aki en cuestion. E tipo di incidentenan aki ta pone un luz sumamente negativo riba loke ta siguridad di nos Pais. Mas ainda e ta trece nos unico pilar económico cu ta nos turismo, na peliger. E realidad amargo ta, cu si no tabata asina facil pa yega na arma di candela y otro articulonan ilegal riba nos Pais, e Minister encarga cu Husticia lo no tabata man na cabez cu un “high season” nunca antes bisto di criminalidad.

No ta di awor nos ta boga pa algo sosode na por ehempel nos costanan. Mas blauw riba caya ta yuda sigur, pero tambe mas atencion directo na nos costanan pa evita articulonan ilegal manera armanan di candela y droga drenta Aruba mester a ricibi atencion cual den mas di 5 aña no a ricibi. Lamentablemente no tin un maneho fiho pa evita entrada di arma y droga na nos Pais! Además di no tin definicion di tarea pa e departamento di Warda Nos Costa, ni landsbesluit pa regla e cuestion di nan autoridad tin. No tin radar, no tin helicopter, bottom-line, no tin un vision!

“Si nos para keto riba e cuestion di radar, e problema principal tabata Marina Real cu no tabata contento cu un grupo di civil na Aruba por a sigui nan movecion riba lama atrabez di radar. Si a persisti y a por ehempel regla un team special den cual a combina diferente experticio manera di polis, marina real y civil profesional, tempo cu Aruba ainda tabata tin su propio radarnan, awe nos fronteranan lo tabata mucho mas miho cuida! Lamentablemente a laga radarnan bai y sin demostra esfuerzo alguno pa sikiera optimalisa e servicio cu nos di Aruba ta ricibi for di Marina Real na Corsou.

E hecho cu personanan por drenta nos Pais y zomaar tin acceso na armanan pisa, ta motibo principal di e "high season" cu nos ta biba aden na 2015. E ola di atraco cu a bin ta asota nos Isla full e aña aki, sigur ta subraya nos ponencia. A yega e momento di bira serio y atende cu e preocupacion cu ta reina den pueblo. Ban stop cu "cosmetica" pa djis sigui purba na scapa cara politico largo bai. Pueblo ta exigi convivencia, pueblo kier su siguridad! Ban stop di sconde tras di por ehempel cifra y duna Husticia y Prevencion e balor real cu e merece! Y si no por, hala un banda pa otro si bin hacie!" Parlamentario Besaril ta termina.