Den un entrevista recien Parlamentario, sr. Guillfred Besaril a expresa su preocupacion pa cu e desaroyonan na scol di polis. E Parlamentario a declara cu recientemente el’a tuma nota di e declaracion den medionan di prensa di e directora di scol di polis. Despues di a analisa e articulonan cu a keda publica, e Parlamentario a expresa cu e esencia y e urgencia di e situacion no ta bin contundentemente padilanti. Señor Besaril a declara:

"Sra. Richardson-Baars a declara cu na e momentonan aki tin un continuidad den e diferente nivelnan di estudio cu scol pa polis ta ofrece. E señora directora a declara ademas cu scol pa polis ta hasta organisando curso pa instancianan pafo di Cuerpo Policial, manera enter otro KIA. Loke no a wordo menciona ta, cu desde aña 2013 no a drenta ni un solo studiante como cadet (aspirant) nobo pa Cuerpo Policial. Ni na nivel Mbo-2 mucho menos na nivel Mbo-4! E continuidad na cual e señora directora a referi na dje siman pasa, ta di personal cu a drenta scol pa polis en todo caso prome cu aña 2013!

E preocupacion di Fraccion di MEP ta e futuro inmediato di e organisacion policial y e impacto di e decision politico di no a recluta cadete (aspirant) nobo e ultimo 3 aña. Cuerpo Policial ta un organisacion dinamico. Tanto como organisacion, como e retonan cual e ta enfrenta pa salvaguardia e siguridad y trankilidad di nos Pais. Ta pa es motibo aki e ta sumamente importante pa semper recluta un cierto cantidad di hende pa drenta e organisacion pa asina reemplasa esnan cu sea pa motibo di pensioen of pa motibo di a haya un otro oportunidad, ta bandona e organisacion.

“Manera cu mi a menciona anteriormente, pa 3 aña (2013 - 2014 - 2015) no a tuma niun candidato nobo. For di tempo cu mi tabata un lider sindical semper mi opone fuertemente contra e fenomeno "Cheap Labor" den Cuerpo Policial. Ta varios debate nos a hiba tanto cu e Minister di Husticia como e Alto Comisario di Polis pa evita e fenomeno aki. Y semper enseñansa y educacion pa adulto (Long-Life-Learning) tabata e arma pa kibra e cuestion di "Cheap Labor" den Cuerpo Policial. Awor e organisacion lo bay absorbe den un futuro un realidad nobo ya cu no tin hende a drenta nobo, pues no lo tin opleiding, consecuentemente no lo tin crecemento pa esnan cu si ta forma parti caba di Cuerpo Policial!" e Parlamentario ta subraya.

Sr. Besaril ta referi specificamente na e fenomeno cu pa varios aña ta un realidad den Cuerpo Policial. Simplemente e ta un hecho cu ta sigui sucede, esta cu tin polis di cierto rango ta eherce tareanan cu ta coresponde na un agente di un rango mas halto, pero cu ta sigui ricibi e mesun salario cu ta mara na su rango original. Parlamentario Besaril ta sigui elabora: "E realidad ta cu mayoria polis kier sigui crece den e organisacion y e gobierno actual cu su maneho desastroso, no ta brinda nan e oportunidad cu nan ta desea. Si no tin hende nobo, e mesun polisnan lo keda mara na e tareanan cu nan tin awor, sin e oportunidad di cambio of progreso. Esaki ta un situacion sumamente demotivante y preocupante.

Un otro aspecto sumamente preocupante ta e situacion di siguridad den e area di "High Rise" hotels. E cadetenan (aspirantenan) di polis nivel Mbo-2 cu a drenta den servicio prome cu 2013, lo mester a tuma entre otro e tareanan cu Visibility Team tabata ehecuta den pasado. Door di e desaroyo actual e pregunta cardinal ta keda: "Kende ta bay haci e trabou di vigilancia y siguridad awo den area di hotel una bes e polisnan nivel MBO-2 termina nan estudio y progresa no solamente den rango sino tambe den tarea y responsabilidad den Cuerpo Policial.

Nos Fraccion ta keda preocupa cu e desaroyo. No tin un Ministro cu realmente ta duna e aspecto di siguridad y prevencion e atencion debido. E desaroyo actual sin duda algun lo tin su efecto negativo a largo plaso. E gobierno di Mike Eman a prueba un biaha mas di tin e prioridadnan robes door di no aloca e fondonan necesario unda cu realmente tabata tin mester, pero ta sigui na opta pa haci inversionnan tipo estetica!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co