E siman aki Parlamento ta trata e Cuenta Anual di Pais Aruba pa 2013 y hunto cu esaki e rapport di e investigacion cu Algemene Rekenkamer (ARA) a haci riba e cuenta aki. Den e rapport ARA ta remarca cu na 2013 atrobe Gabinete Eman a surpasa e presupuesto, no ta splica e desviacion y no a cumpli cu marconan financiero cu e mes a presenta.

E resultado di e investigacion di ARA riba e Cuenta Annual di 2013 di Pais Aruba ta mustra cu na aña 2013 Gabinete Eman a bolbe surpasa su presupuesto aproba pa Parlamento. ARA ta remarca cu door di surpasa su presupuesto Gabinete Eman ta actua ilegitimo, pues contra ley, ya cu nan no ta cumpli cu e stipulacion di ley cu ta duna Parlamento e posibilidad pa husga y opina riba casonan den cual ta premira cu lo surpasa e presupuesto. Esaki kiermeen cu Parlamento mester duna aprobacion promer cu Gabinete Eman haci gasto extra y esaki no a sosode. Banda di esaki, ARA ta remarca cu Gabinete Eman no ta splica e surpaso di gasto y tampoco ta duna splicacion adecuadamente den e cuenta anual riba e entradanan di gobierno cu ta keda atras. Di e manera aki Gabinete Eman ta faya den duna cuenta con ela maneha e placa di Pueblo y ta actua na un manera ilegal.

Na 2010 Gabinete Eman a presenta un Cuadro Financiero 2010-2014 den cual nan a presenta e plan pa drecha nos finanzas publico door di baha e deficit financiero cada aña cu 75 miyon florin. E plan aki nunca a traha ya cu Gabinete Eman a gasta hopi mas cu ela presupuesta. Na 2013 Gabinete Eman a cambia e cuadro un tiki, pero tampoco por a tene su mes na su palabra. Den e rapport, ARA ta remarca cu ya caba ora di presenta e presupuesto na Parlamento esaki tabata desvia di locual Gabinete Eman mes a bisa den nan plan. Riba dje, e presupuestonan a wordo cambia via un presupuesto suppletorio y cu esaki a desvia mas ainda di e marconan financiero cu a keda presenta den e plannan di Gabinete Eman. Pero awor cu e Cuenta Anual di 2013 a keda presenta ARA ta constata cu e cifranan real ta mustra un desviacion aun mas grandi di e plan cu Gabinete Eman mes ta presenta.

Pues for di e rapport di ARA riba e Cuenta Anual di Pais Aruba 2013 ta bira bisto cu Gabinete Eman tin basta splicacion pa bay duna riba e maneho financiero hiba cu placa di Pueblo. Nan no a tene nan mes na e plannan cu nan mes a presenta. Nan a gasta placa dimas, sin autorisacion adelanta di Parlamento y riba dje no kier duna splicacion drechi na kiko nan a gasta placa extra y pakiko entradanan a keda atras.

17 november 2015

Expresionnan haci den e articulo aki no necesariamente ta refleha opinion di ArenaPoliti.co