Den e rapport di Algemene Rekenkamer, Controlaria General, riba e Cuenta Annual di Pais Aruba pa 2013, e organo di control aki ta raporta cu e falta di supervicion a traduci su mes den consecuencianan serio pa finanzas di e Pais. Ta bisto cu aki ta wordo referi na e falta di control di parti di e Fraccion di AVP den Parlamento cu no a sabi di haci e trabou di controla Gabinete Eman debidamente y cu a permiti pa awe nos Pais ta den un abismo financiero.

Aproba presupuesto irealistico  
Na hopi ocacion Gabinete Eman a entrega presupuestonan cu un seyo irealistico na Parlamento di Aruba. Nos di opocicion a sa di trece esaki dilanti y cuestiona gobierno riba e presupuestonan irealistico aki na man di tur e consehonan cu Raad van Advies ta duna. Nos a mustra riba e peligernan cu esaki lo trece pa nos finanzas publico y pa e Pueblo cu despues lo wordo confronta cu medida pa por drecha e situacion penoso den cual Gabinete Eman ta hinca nos aden. Pero e Fraccion di AVP no kier a tende y no kier a realisa kiko rapportnan di Raad van Advies, IMF, Standard and Poor’s y Fitch tabata bisa nos, y a opta pa bay wowo sera de acuerdo cu tur e presupuestonan irealistico di Gabinete Eman.

A grita voor sin worry cu consecuencia
Awe e consecuencia di e gritamento ‘voor’ pa presupuesto irealistico y e falta di control di parti di e Fraccion di AVP ta bisto. Gobernador a nenga di firma e presupuesto, Gabinete Eman a haya KB, Aruba ta bou supervicion financiero di CFT y e menasa di Hulanda pa ‘take over’ gobernacion di e Pais aki via un ‘Algemene Maatregel van Rijksbestuur’ ta vigente. Y tur esaki pasobra cu Fraccion di AVP a faya di haci nan trabou di controla Gabinete Eman. Nan a djies grita voor sin worry cu consecuencia di nan voto pa nos Pais. Si e Fraccion di AVP a traha na bienestar di nos Pais awe nos Pais no lo ta hinca den un abismo financiero.

ARA ta confirma cu Fraccion di AVP a dania nos finanzas publico
Nos di opocicion a cumpli cu nos deber di controla Gabinete Eman y informa Pueblo riba e peligernan di e maneho fiscal cu ta wordo hiba. Nos a hasta mustra cu e solucion tabata riba mesa tur tempo desde 2007. Pero lamentablemente awe Fraccion di AVP a prefera di keda sin haci nan trabou di supervicion y esaki a traduci su mes den consecuencianan serio pa finanzas di e Pais aki. Algo cu Algemene Rekenkamer ta confima den su rapport riba e Cuenta Anual di nos Pais pa 2013.

2 september 2014

Expresionnan haci den e articulo aki no necesariamente ta refleha opinion di ArenaPoliti.co