Gabinete Eman a sconde gasto y na 2013 tur cos a sali na cla  

E rapport di investigacion di Algemene Rekenkamer Aruba (ARA) riba e Cuenta Anual 2013 ta brinda hopi informacion cu ta yuda Parlamento pa haci su trabou di controla e gobernacion di Gabinete Eman. Den e rapport ARA ta mustra con Parlamento a bay di acuerdo cu presupuestonan irealistico ya cu Gabinete Eman a sconde gasto pa asina por a presenta presupuesto ‘bunita’ na Parlamento, pero den 2013 tur e gastonan aki a sali na cla.

Na hopi ocacion nos di opocicion a informa Pueblo riba e presupuestonan cu ta keda presenta pa Gabinete Eman na Parlamento cu ta hiba un seyo irealistico di Raad van Advies. Pero ta parce manera cu e mayoria den Parlamento no tabata kier a compronde e conseho cu Raad van Advies tabata duna. Awe ARA tambe ta yega na e conclucion cu Gabinete Eman a presenta presupuestonan irealistico. Gabinete Eman no tabata presupuesta su gastonan manera mester ta y esaki ta pone cu Parlamento tabata aproba presupuestonan cu no ta basa riba e realidad.

ARA ta remarca riba pagina 23 di su rapport cu e post Gastonan di añanan anterior ta mustra un crecemento exponencial den e ultimo añanan di 2010 pa 2013. Motibo pa esaki ta cu e gastonan aki no tabata wordo presupuesta, pero despues si nan tabata wordo responsabilisa den e cuenta annual. ARA ta haya e crecemento exponencial aki preocupante, pasobra e ta implica cu e presupuestonan aproba pa Parlamento den e ultimo añanan ta duna un bista eroneo di e realidad. Cu otro palabra, e ultimo añanan Parlamento a bay di acuerdo cu presupuestonan irealistico.

Esaki ta otro muestra cu e mayoria den Parlamento a faya barbaramente den haci nan trabou di control riba Gabinete Eman. Pasobra si nan a tuma e consehonan di Raad van Advies na serio y a cuestiona Gabinete Eman realmente, nunca nan por a bay di acuerdo cu presupuestonan irealistico. Locual cu ARA ta trece den su rapport dilanti ta un brevet di onvermogen pa e Fraccion di AVP cu a bay wowo sera cu tur e presupuestonan aki. Di otro banda, e rapport di ARA ta demostra con Gabinete Eman a bin ta manipula cu cifra, scondiendo gasto, pa por presenta un presupuesto ‘bunita’ na Parlamento pa su aprobacion. Di e manera aki Gabinete Eman a trapa riba e budgetrecht di Parlamento, ta falta Pueblo respet y ta haci un danio grandi na e finanzas publico di e Pais aki.

17 november 2015

Expresionnan haci den e articulo aki no necesariamente ta refleha opinion di ArenaPoliti.co