Diabierna anochi Ministernan Otmar Oduber y Michelle Hooyboer-Winklaar hunto cu CEO di ATA, Ronella Tjin Asjoe-Croes tabata huespedenan di honor na sector di Hospitalidad y Turismo di EPI pa mira e inversionnan realiza caba cu e mey miyon Florin cu Hunta di Supervision di ATA a aproba pa e scol aki.
Dia di celebracion di cumpleaños di Minister Oduber, 7 di augustus di e aña aki, el a bishita EPI hunto cu su colega di Enseñansa, CEO y miembronan di e Hunta di Supervision di ATA pa wak con e sector di Hospitalidad y Turismo ta bayendo y scucha for di e directiva nan necesidadnan. Despues di esaki, Minister Oduber a papia con CEO y miembronan di Hunta di Supervision di ATA y a acorda cu nan lo sostene e inversionnan cu e sector educativo aki a presenta, den cuadro di mehoracion di calidad di turismo, di cual enseñansa ta un parti esencial.
Durante e bishita di diabierna anochi, e mandatarionan por a wak un cantidad di material pa mehora e infrastructura di network, mientras cu a haya informacion di e diferente otro inversionnan cu ta bay tuma lugar dentro di poco.
E placa ta wordo destina pa ekiponan di cushina, ekiponan di enseñansa y mehoracion di e infrastructura di e netwerk, di cushina y facilidadnan di enseñansa.
Directiva, personal y studiantenan di EPI Hospitalidad y Turismo a probecha e ocasion pa conta e mandatarionan e diferente logronan cu nan a obtene, mientras cu a gradicinan y tambe ATA pa e sosten duna na e sector importante aki.
Minister Otmar Oduber a gradici tur esnan di EPI pa nan esfuerzo y dedicacion pa engrandece sector di turismo cu ta nos pilar economico y a felicitanan pa e avancenan cu nan a bin ta realizando. El a indica cu esaki ta e prome steenchi di hopi cu nan lo pone pa construi un EPI nobo y e mes hunto cu su coleganan lo ta para tras di esaki.
E anochi a finaliza cu un buffet increibel prepara pa e studiatenan di ultimo aña di AI. Como examen nan mester a prepara diferente plato y presenta esakinan na e mihor forma posibel nan nan profesornan y invitadonan.
Minister Oduber hunto cu su casa a keda pa disfruta di e platonan aki y aprecia e gran calidad di futuro profesionalnan cu EPI Hospitalidad y Turismo ta peparando pa sigui mantene nos isla dos stap dilanti di nos competidornan. El a bisa na final cu e ta contento di por a contribui a traves di ATA cu e futuro di e siguiente generacionnan di profesionalnan den e ramo di turismo.

Expresionnan haci den e articulo aki no necesariamente ta refleha opinion di ArenaPoliti.co