Parlamentario Sr. Jeffrey Kelly:

Mep ta vota contra ley pa cuido di nos grandinan y despues ta hiba regalo pa nan

Trata di compronde e vision politico di e lider di Mep, lo tuma un esfuerso grandi pa nos pueblo, ya cu realmente loke EWC y su fraccion ta haciendo, ta asina contradictorio cu e tin pueblo confundi.
Parlamentario Jeffrey Kelly di fraccion di Avp ta mustra cu aña 2015 a transforma su mes den un serie di actuacion dudoso di principalmente e lider di Mep hunto cu su miembronan di fraccion.

Segun Sr. Kelly, no ta pasa un solo presentacion di e lider di MEP, cu e no ta probecha pa trata di pasa pueblo un “fastball” cu informacion sin base y mentiroso, hayando inspiracion den un vision negativo y destructivo.

Tur hende por a ripara cu no ta di awo e cos aki ta pasando, esta cu lider di Mep ta bin cu declaracionnan cu ta contradictorio, actuacionnan conflictivo domina pa un hipocresia di marca mayor contra di nos pueblo.

Ley di maneho di cuido pa nos grandinan

Siman pasa Parlamento a trata e ley cu ta regula y sigura un miho cuido pa centronan cu ta tuma nos hendenan grandi caminda ta sigura cu mama- y tatanan por keda den di e centronan aki, caminda ta sigura e miho cuido y proteccion na man di profesionalnan capacita cu sa kico nos hendenan grandi ta rekeri.

Na final di e reunion fraccion di Mep a bira sostene varios mocion cu a wordo presenta pa fraccion di Avp hunto cu e ley aki, pero pa sorpresa di tur hende, fraccion di Mep encabesa pa EWC a vota contra di e ley cu ta sigura miho cuido pa nos hendenan grandi.

Un accion sin precedente cu for di algun tempo caba a bin ta marca e rumbo politico di e Mep nobo bou liderazgo di EWC, cu simplemente ainda no por mustra pueblo kico e lo aporta pa percura pa un miho desaroyo pa nos isla.

Hipocrecia

Sinembargo e sorpresa mas grandi a bin un dos dia despues di e reunion aki caminda fraccion di Mep no tabata kier pa sigura miho cuido pa nos hendenan grandi, ora cu lider di Mep cu algun otro miembro di fraccion di Mep, a bishita algun centro di cuido di nos hendenan grandi, cu regalo, cu kerstboom y decoracionnan.

Ta increibel pa tuma nota di esaki ya cu apenas algun ora prome den Parlamento, lider di Mep no kier a sostene un ley cu ta sigura miho cuido pa nos grandinan y aki pueblo por ripara un biaha mas e falta di respet cu lider di Mep tin pa nos pueblo, especialmente nos grandinan.

Bo ta caba di nenga di sostene un ley pa sigura miho cuido y proteccion di e grandinan pero despues ta bay sconde tras di un kerstboom y luznan di Pasco, pa laga pasa cu el a haci algo pa e hendenan aki. Simplemente hipocrecia di marca mayor!

Ta un situacion tristo, algo di lamenta ya cu ta un actuacion cu ta lanta duda den pueblo riba e rol cu Parlamentarionan tin cu mustra den nos comunidad na tur momento ya cu pueblo ta spera cu su representantenan den Parlamento, ta hendenan honesto, respetuoso cu ta para pa nan proteccion na tur momento.

Pero ya caba pueblo a cuminsa custumbra cu EWC y henter fraccion di Mep ta habri siman cu mentira riba nos pueblo y ta sera henter e aña sin mustra cambio den nan comportacion, Parlamentario Jeffrey Kelly ta declara.

Expresionnan haci den e articulo aki no necesariamente ta refleha opinion di ArenaPoliti.co