Evelyn Wever-Croes (MEP): Fraccion di MEP presente na recepcion di anja nobo di gobernador
RESPET Y DIALOGO TA NECESARIO DEN 2016
ORANJESTAD -- Fraccion di MEP tabata presente na e recepcion di anja nobo di Gobernador sr. Refunjol. Lider di MEP, Evelyn Wever-Croes, despues di a atende e recepcion di anja nobo di Gobernador y scucha su discurso, a indica di ta di acuerdo. Den su discurso Gobernador a expresa su preocupacion pa e polarisacion politico creciente na Aruba.
"Hustamente locual mi a bin ta señala desde cu mi a drenta politica. E politica di nivel abou, den cual ta lastra Tata, Mama, Ruman, Tanchi awe a duna su resultado. Un Aruba dividi y yena cu odio. Un persecucion constante contra esnan cu ta pensa diferente. Un falta di respet pa opinion di otro y un arogancia den gobernacion cu a condusi na perdida di nos autonomia, y un biaha mas na destruccion na edificio di Parlamento. Por cierto, cu te dia di awe gobierno no kier publica e rapport di investigacion kiko a pasa realmente e dia ey, y cual ta e agentenan policial cu a lansa tiro di pistol riba e manifestantenan. Ta e cosnan aki ta pone pueblo lanta contra pueblo.
Pa evita escalacion mester bolbe bek na e tempo cu ta trata otro cu RESPET, cuminsando den Parlamento, maske bo ta forma parti di oposicion. Tur miembro di Parlamento tin e derecho di wordo trata igual, sin privilegio. Y tur miembro di parlamento merece di wordo trata cu respet. Debatenan den Parlamento mester bai cu argumento y cu respet, y no mester bai na insulta Tata, Mama, Ruman of Tanta. Gobernador a mustra tambe riba e forma hopi negativo cu prensa sa bai na ataca oponente, y a desaproba esaki. Nos no por generalisa, pasobra tin varios miembro di prensa cu ta hasi nan trabou na forma obhetivo, sinembargo tin cierto miembronan di prensa cu ta scohe pa ataca nos di oposicion na forma hopi baho, simplemente pa defende gobernantenan. Nan no merece yama nan mes 'prensa', pasobra nan ta falta respet no solamente pa politiconan oponente, sino na e trabou di prensa tambe.
Pa evita escalacion mester bai bek na DIALOGO, pero dialogo real maske bo tin otro pensamento politico. Un forma pa logra esaki nos a inclui caba den nos programa di campanja na 2013: dialogo entre lidernan politico riba base regular. Bo no mester ta di acuerdo tur ora, pero esey no mester stroba un dialogo. Ami ta boga pa cuminsa awor mes, y no warda te e sigiente eleccion, pasobra pa e ora ya nos ta demasiado laat", lider di MEP Evelyn Wever-Croes a duna di conoce.
Expresionnan haci den e articulo aki no necesariamente ta refleha opinion di ArenaPoliti.co