Un di e retonan financiero mas grandi di nos pais di e ultimo añanan tabata e con ta bay kita e peliger grandi cu e dos fondonan di pensioen, AOV y APFA tabata aden. Tabata tin dos peliger. Uno e peliger grandi cu e fondonan no lo por a sigui paga e pensioen di mas cu 20 mil pensionado y nan famia na Aruba y den exterior. Mescos cu na Hulanda lo mester a corta den e pensioen di tur luna. Esaki lo a nifica cu masha hopi pensionado lo a bay atras seriamente den nan entrada. Na 2009 mas cu 60 porciento di tur pensionado tabata depende di e pensioen di behez como nan unico entrada! Imagina bo cu nan mester a haya menos entrada. E didos peliger grandi tabata cu gobierno lo mester a contribui cu sumanan multimilionario den e fondo, banda di paga su parti como doño di trabao. Anto esey lo mester a sosode durante di e crisis financiero y e refineria sera. Ta door di negligencia di gobierno di MEP for di 2006 esaki a yega asina leu.
Den caso di e fondo di pensioen di trahadornan di gobierno, maestronan di scol y trahadornan di fundacionnan (APFA), e situacion tabata mescos na 2009 ora gobierno di MEP a baha. E fondo tabata tin un cobertura masha abou, cu ta nifica cu e placa den e fondo no tabata yega pa paga tur e pensioennan den futuro. Tambe e prima a subi masha hopi. E riesgonan financiero tabata masha grandi.

2014
Den tur dos caso no a corta den e pensioen di e pensionadonan. Ni di esnan cu ta haya e pensioen di behez, como e pensioen di APFA. Nan a sigui haya nan pensioen normal tur luna. Enbez di corta den e pensioen cu pensionadonan ta cobra tur luna, a scohe pa gradualmente trece cambio den e structura di e pensioen. Proposicionnan cu pa hopi aña ya tabata riba mesa, a wordo ehecuta den forma gradual. Pa falta di curashi a keda sin tuma e desicion aki den pasado. Na 2014 gobierno di AVP a tuma e desicionnan aki sin corta den e pensioen mensual. Al contrario, gobierno di AVP a introduci e "reparatietoeslag" riba e pensioen. Awe tur pensionado ta haya 100 florin mas pa luna riba nan pensioen di AOV y APFA. Anto a haci esey bou hopi critica, pasobra nos pais tabata den crisis. Mientras cu a sigura cu e pensioennan di AOV y APFA a keda na nan nivel y a wordo aumenta cu e "reparatietoeslag", e reformanan a sigura cu tur dos fondo di pensioen a wordo salba. Door di e reformanan e dos fondonan mes por cubri e pensioennan pa hopi aña den futuro, sin corta den e pensioen mensual. E reformanan a elimina tambe e riesgonan financiero pa e pensionadonan, pa e fondonan y pa finansa publico. Na 2013 gobernador di Aruba a duna e encargo explicito na gobierno di AVP pa sigui cu e reforma di e fondonan di pensioen y finalisa esaki mas lihe posibel. Na 2014 esaki a wordo finalisa. Cu e maneho di reforma humano y masha importante aki, a logra un di e reformanan mas significante pa pueblo di Aruba. Entrada di tur pensionado awor y den futuro ta sigura!

Expresionnan haci den e articulo aki no necesariamente ta refleha opinion di ArenaPoliti.co