No kabe duda cu criminalidad ta dominando nos sociedad ! Pero e pregunta di partido PPA ta: Ki esfuerzo a worde hasi e ultimo seis anja door di gobierno y/of parlamento pa analisa e origen di crimen aki na Aruba ?? Y ki esfuerzo a worde hasi pa frena desaroyo di crimen aki na Aruba saliendo for di e punto di salida cu autoridad lo sa e origen di e crimenan aki.

Durante di e seis anja di e gobernacion aki criminalidad riba nos isla a sigui aumenta bai ‘goal’ asina fuerte cu diferente famia riba nos isla no ta ni jama polis ora cierto actonan castigable tuma lugar. Pesey mes cifranan annual di autoridadnan no ta duna un refleho berdadero di criminalidad riba nos isla.

Ministro di Justicia sr. Dowers envez di presenta un maneho pa lucha contra criminalidad a bira conoci pa su expression cu nos ta den e ‘high season’ di criminalidad. Como sifuera …e mensahe na pueblo ta tranquilo pasobra awor ta ‘high season’ pero nos lo drenta ‘low season’ tambe.

PPA ta hasi e pregunta publico…..Ki dia un esfuerzo a worde hasi pa analisa e origen di criminalidad riba nos Isla ? Nos criminalidad tin su aumento door di pobreza ?? Nos criminalidad tin su aumento door di falta di bista di majornan? Nos criminalidad tin su origen door di ‘droga y alcohol’ ? Masha poco ta esnan cu realmente ta preucupa cu e preguntanan aki te ora e problematica di ladronicia of droga of alcohol bati na nan porta di cas. E ora ey ta grita y slama pero esey lo ta poco laat !!.

Varios vez nos ta tende of lesa den medionan ‘e atracador/ladron ta un conocido di polis’ pero despues di algun dia…..ata e conocido di polis ta riba caya atrobe !! Esaki ta hasi PPA conclui cu nos proceso judicial cu e personanan aki ta pasa den lo tin hopi ‘buraco’ no por ta asina cu ‘conocido di polis’ despues di algun dia ta riba caya atrobe……’algo ta definitivamente robez’ !!.

Pero un esfuerzo como sociedad pa frena ‘criminalidad’ na un for serio y unda nos ta traha riba e character /mentalidad di esnan cu a comete eror y ta crea oportunidad nobo pa esnan cu a demonstra e disponibilidad pa drecha nos no a mira ainda !!

Fuera di bai sera den e ‘Korrectie Instituut Aruba’ pa un periodo defini di Corte nos no a nota ningun proceso doleroso aki pa drecha nan mes. Pafor no tin ajudo social ni ajudo pa nan jega na un trabao pa nan. Al contrario nos ‘Korrectie Instituut Aruba’ a para bira un UNIVERSIDAD di crimen riba nos Isla !! Pero nos sociedad …no ta preucupa te ora e bati na nan porta….pero e hora ey ta poco laat !!

PPA ta di opinion cu no solamente Aruba no tin un maneho riba terenonan cu lo mester preveni crimen eficiente…..door di dedica mas atencion na nos juventud. Nos Ministro Presidente ta campanja semanalmente en vez di goberna partiendo promesa drecha caretara, promesa pa pone luz, promesa pa hasi cierto sushedan limpi…tur esaki kizas tin su parti positivo pero PPA ta puntra con ta para den e districtonan na Aruba na unda henter Aruba y sigur autoridad incluso Ministro Presidente Eman ta bon na altura di un criminalidad di otro mundo !! Unda e promesa pa un maneho debido ta ??? Unda e inversion den nos juventud ta keda ?? Unda e inversion sea den fundacionan of den organisacionan den bario pa sostene nos juventud cu cosnan ‘positivo’ pa nos juventud hasi. Unda e obligacion ta keda pa ora un joven of persona major cai sera pa obligele pa sigui un programa mientras cu e ta den K.I.A mara e ‘V.I.’ popular na condicionan pa continua cu un programa pafor unda instancianan ‘social’ di gobierno ta mara pa guia e persona aki, sostenele den rondia un trabao, dunele un ‘onderstand’ temporal y ora e ricibi e trabao….controle pa un periodo. Aki na Aruba si e ta conoci e ta poco ejecuta !!

Pesey mes hopi ‘conocido di polis’ ta trempan bek riba caya y esnan cu bai sera na K.I.A. ta simpelmente drenta e instituto UNIVERSITARIO DI CRIMEN ARUBANO……discussion pa prepara unda ta bai echa baina unda vez nan sali…………un berdad conoci pa hopi pero cu tin atencion di poco y aki sigur nos autoridadnan envolvi riba tanto riba tereno social/judicial.

Ministro di Justicia Arthur Dowers ta gaba con ‘boet’ di polis a casi triplifica den su periodo di gobernacion……wel wel……si bo sa cu hopi cu ricibi e boetnan relativamente halto aki no tin e fondo ey pa paga sea nan famia ta sufri e consecuencianan cu algun ‘mucha’ ta keda sin cominda etc pa algun dia pa e tata of mama por paga e boet y hopi cu ricibi e ‘boetnan’ aki ta tene collecta den famia y Amistad pa por paga e ‘boetnan’ aki…..esey ta e realidad scondi tras di e suma halto di ‘boetnan’ y esnan cu simpelmente no tin placa pa paga y ‘finalisa’ den K.I.A. unda comunidad ta paga pa nan estadia di algun dia of siman anto e grupo aki ta den e “Universidad di crimen’ tambe cu tur consecuencia pa nos propio sociedad.

PPA ta di opinion cu gabinete Mike Eman/Ministro Arthur Dowers a faya barbaramente pero tambe e ministronan encarga cu un maneho social…un maneho educacional durante e periodo cu nan ta pagando pa nan actonan pero tambe despues. Sin esaki criminalidad na Aruba ta simpelmente un desaroyo creciente cu nos autoridad y sociedad cu hopi dolo ta permiti sigui su curso !!

Aruba, 28 di februari 2016
BENNY NISBET,
Lider Politico di PPA

Expresionnan haci den e articulo aki no necesariamente ta refleha opinion di ArenaPoliti.co