E ta obvio cu despues di 7 anja di gobernacion di Mike Eman nos pais no a conoce progreso. A; contrario, famianan ta pasando den momentonan dificil y placa no ta alcansa pa cumpli cu tur obligacion. Gobierno a hiba un maneho di fia placa, crea debe y hypoteca futuro generacionan. Ora nos tende Mike Eman papia cu su gobierno no a tuma ningun medida nos mester recorda Mike Eman loke e la haci cu tur future pensionado. Mike Eman no solamente a hisa e edad di pensioen pa 65 anja sino a aumenta e prima di AOV tambe. Mike Eman, cu e medida aki, a kita for di cada pensionado 60 luna di pensioen cu ta casi 120.000 florin. Kiermen Mike Eman mester stop di ganja pueblo y malinforma nos communidad. Cada ken por calcula pa nan mes cuanto cos nan por a haci cu e 120.000 florin cu Mike Eman a kita for di nan, algo cu nan tawata tin derecho riba dje.

Awor tin desaroyonan y desicionnan cu nos ta puntra nos mes si esaki tabata prioridad y necesario: nan tabata sabi y por tabata otro? Pakico a fia asina hopi placa y redobla e debe national? Pakico a gasta tur placa na viahe, nombra miles di coordinador, a duna hopi contractnan na famia, amigo y sponsernan. Pakico gobierno a bay pa desaroya pilarnan nobo di economia manera conferencianan di ‘green’ y crea un ‘hub’ pa Sur America hunto cu TNO cu awe NO ta existi.  Pakico a inverti 32 miyon na tramnan enves di construi un Mavo/Havo/Vwo school nobo na Noord. Ta increibel pa constata cu despues di casi 7 aña den gobernacion tur nan intentonan pa desaroya un pilar nobo di ‘hub’ economico a fracasa y miyones di florin a wordo gasta. E  fracaso tin nomber y fam esta Mike Eman debi cu e ta un lider debil, cu no tin vision y no ta sincero pa tuma desicionnan cu ta na fabor di enteres general y nos pais. Door di e fracaso economico di Mike Eman ela opta pa tuma hopi medidad ariba lomba di e pueblo dies pa yena caha di gobierno y sigui cria su famia, amigonan, coordinadornan y sponsernan di Avp. A mal goberna y cos a casi pega cu mester a bay hasta contra nan promesa di campañia y hisa BBO di 2.5% pa 3.5%, a aumenta prima di AOV/AWW, prima di AZV y hisa tarifa di awa y coriente cu 15%. A hisa edad di pensioen pa 65 aña y castiga tur trahador y nos pensionado. Pakico? Pasobra Mike Eman a hiba un mal maneho, a fia miyones y gasta hopi placa. Mientras prijs di crudo mundialmente a baha bao di 40 dollar, tur cuidadano na tur isla den Cariba, a goza di un rebaho den prijs di gasoline, tarifa di celular, tarifa di awa y coriente. Nos pueblo ta paga un prijs hopi caro debi di $96 na mal decision di ‘hedging’ den Gerencia di WEB y instruccion di Ministro de Economia. Ta tristo pa constata cu tur luna 4000 famia no por pagan a recibo di awa. Y 8000 persona tin problema pa paga nan recibo di coriente. Tres aña largo nos pueblo lo keda paga caro pa awa y coriente y lo no tin alivio pa pueblo. Sin duda sin e mal desicionan aki di gobierno di Mike Eman AVP nos no lo tabata tin e problemana cu nos ta aden. Hopi famia ta realisa awor pakico  nan yuinan  no por haya trabao. Ta den korant por lesa con Minister di Trabao, ta keda firma permiso di trahador pa estranhero mientras tin 23 % di nos hobennan cu no tin trabao. Ta net e hobennan desemplea aki por a yuda nan famia den e crisis cu nan ta pasando aden.  Loke a kibra tur record ta e hecho cu mientras tin 11 mil hende registra pa un tereno na DIP nos ta lesa cu Minister di Infrastructura, ta duna solamente su amigo, famia y sponsernan tereno grandi. No tin terereno pa pueblo pero pa nan si. Criminalidad a sali for di man y nos pais ta ‘out of control’.

E politico di AVP ta sin gevoel, y awor mas cu nunca tin di saca nan conclucion pa e mal maneho. Un maneho anti pueblo. Nos pueblo no por mas cu tanto abuso y medida. Partido AVP a faya y no ta scucha pueblo y no ta traha na enteres general. Mike Eman y tur su ministronan ta traha pa nan amigo, famia y sponsernan di campañia. Nos pueblo ta harta y fada di tur corrupcion cu a tuma lugar den renobacion di Caya Betico Croes, Linear Park, Benta di tereno di gobierno, Molina di Biento na Alto Vista, den e proyectonan di Renobacion  Hospital y Green Corridor. Nos compromiso ta pa stop Mike Eman y AVP pa tuma mas medida contra pueblo y stop tur forma di corrupcion. Nos Lider Evelyn Wever Croes di MEP, na varios ocacion a bisa cu nos partido tin alternativa pa e crisis economico y financiero cu gobierno di Aruba ta aden. Cu nos solucion ta uno husto y pro pueblo. Esta cu lo tin di bay di 9 pa 7 ministro. Nos tin di pone ordo den gobierno y den nos pais. Partido MEP lo bay crea e confiansa bek serca inversionistanan y “jump start” nos economia. Bini cu inversionan den tur sector caminda ta crea trabao nobo y duna prioridad na nos hobenan arubiano pa haya trabao. “ Nos compromiso ta pa hunto cu nos pueblo trese un cambio pa un mihor Aruba. Cu boso sosten nos ta bay regla esaki den e gobierno nobo”.

Expresionnan haci den e articulo aki no necesariamente ta refleha opinion di ArenaPoliti.co