Minister Oduber di bishita na Scol di Arte.

Minister di Cultura Otmar Oduber durante su bishita na San Nicolas a pasa na Scol di Arte, pa mira tur e trabounan cu ta wordo haci pa hubentud na e instituto aki. E mandatario a bisa na e ocasion aki cu e ta hopi contento cu loke UNOCA ta haciendo despues di nan restructuracion. Mi ta hopi satisfecho mes cu e trabou cu UNOCA a bin ta haciendo. Algun tempo atras a haci restructuracion den UNOCA, unda cu a adapta e apoyo cu mester wordo brinda na artistanan local, unda  tin un fluho den e conscientisacion di e propio artista riba con nan por yega na remarca pa haya subsidionan for di UNOCA. Pero tambe UNOCA a cuminsa haci mas uzo di infrastructura nan cu nan tin den nan poder manera Scol di Arte na San Nicolas. Segun e mandatario a sigui bisa, masha poco hende tabata sa di e instituto aki cu UNOCA tin, cu ta un joya di un edificio. Den cuadro di brinda mas servicio, aña pasa e fundacion a cuminsa cu e programa di Summer Camp pa muchanan cu a keda hopi encanta pa cual a ripiti esaki un biaha mas den 2016. E programa t'asina popular cu tin un bus cu ta sali for di Playa, pa participa den e programa aki di Scol di Arte na San Nicolas. E peticion ta pa sigui mas tanto posibel cu tipo di programanan asina. Esaki ta e base pa cual Gobierno ta den proceso pa cuminsa cu un proyecto hunto cu MOBIS,  cu cual kier bay den tur centro di bario.  A tene reunionnan mas o menos 2 aña pasa caba cu e gruponan aki pa mira cual ta e Centronan cu no ta ekipa y mester di e apoyo. Na luga di lanta un departamento, e mandatario a splica, a busca cooperacion cu un fundacion existente caba, esta MOBES, cu a brasa e proyecto mesora. Den luna di augustus ta cuminsa cu e summercamp aki den cuatro Centro di Bario na Aruba. Na september of october ta cuminsa cu e trayecto mes den 6 pa 7 Centro di Bario, den cual hobennan por participa, manera esun di UNOCA, unda cu e enfoke ta completamente riba arte: baile, canto, pintamento, actuacion, creatividad, artesania, etc. E mandatario a keda impresiona den e obranan cu e hobennan a traha, basa riba e tema cu nan a haya pa traha riba dje. Den e creatividadnan cu e hobennan a demostra cu nan ta hopi consciente di loke ta pasando rond di nan.E mandatario a splica cu e programa ta parti den tres fase den un aña y kier yega na 1800 mucha cu lo siña di e diferente tipo di arte y cultura pa identifica kico nan ta gusta, y scoge riba cual area e muchanan kier concentra nan mes den futuro riba dje. Den cuadro di e intencion ariba menciona, e bishita na e Summercamp di UNOCA tabata importante pa Minister Oduber y su Team. Di e forma aki ta haya mas idea pa e programa di Arte y Cultura cu kier introduci na scolnan tambe. Tin un comision ta trahando riba e posibilidad, cu cooperacion di diferente Ministerio, pa asina e bira un curriculum riba su mes. Den e mesun pensamento aki tin e idea pa digitalisa tur loke ta asuntonan di cultura.  

Expresionnan haci den e articulo aki no necesariamente ta refleha opinion di ArenaPoliti.co