Ayera mainta e fraccion di AVP den Parlamento a tuma diferente desicion riba organisacion di e fraccion cu pa algun tempo tabata pendiente. E desicion mas importante ta e cambio di lider di fraccion. Rene "Baba" Herde' cu tabata e lider di fraccion for di aña 2009, a pasa e funcion pa su colega Marlon Sneek cu for di 2013 tabata e lider di fraccion interino. Chris Dammers ta asumi awor e funcion di lider di fraccion interino. E otro desicionnan tin di haber cu repartiicion di tareanan interno den e fraccion, formanan nobo pa reunion den e fraccion y preparacion pa e aña di debate publico prome cu eleccion 2017. Den e debate publico aki e fraccion cu su politiconan experiencia ta hunga un rol importante. E fraccion cu na 2009 tabata consisti di 12 miembro di cual solamente dos tabata tin experiencia den Parlamento, awe ta consisti di 12 miembro cu amplio experiencia, conocemento y habilidad politico, cu ta resalta den cada debate den Parlamento y den prensa. Hasta den tempo cu e fraccion nobo mester a debati den Parlamento cu un fraccion di 8 miembro di MEP di cual tres ex-minister y cuatro parlamentario cu experiencia, e motivacion, conocemento, creatividad y curashi di e fraccion di AVP, a sa di domina e fraccion di MEP totalmente, apesar di e experiencia mas grandi di e fraccion di MEP. Awe ainda esey ta e caso. Den cada debate e fraccion di AVP ta demostra un conocemento amplio, un deseo pa cambia cos na interes di pueblo y un habilidad di ta critico y di tene na ehecucion di e programa di partido AVP.

MARLON SNEEK a demostra un creatividad, inteligencia y habilidad politico grandi den e shete aña cu a pasa. Ela crece enormente y tanto na Aruba como den relacionnan den exterior, a demostra un capacidad y madurez pa maneha asuntonan y situacionnan den un forma cu a gana respet den y pafor di partido y Parlamento. E hoben politico aki sin duda ta promete hopi pa futuro. Su nombracion como lider di fraccion ta simpelmente un paso logico mas den su carera.

CHRIS DAMMERS a fungi e ultimo 5 aña como Vice Presidente di Parlamento. Den fraccion e ta un di e organisadornan interno di hopi trabou cu e fraccion ta haci. Su profesion di ingeniero ta resalta den su trabou como un parlamentario bon organisa, disciplina y masha puntual. Su nombracion como lider interino di fraccion tambe tin e sosten completo di e fraccion y di partido.

Diahuebs mainta e lider y lider interino di fraccion di AVP lo wordo presenta na prensa local y internacional. Rene Herde' lo keda ocupa e funcion di Vice Presidente di Parlamento y di presidente di e Comision di Ausntonan Exterior & di Reino di Parlamento di Aruba. Fraccion di AVP ta felicita e lider y lider interino nobo di fraccion di AVP y desea nan hopi exito den nan funcionnan importante den Parlamento.

Expresionnan haci den e articulo aki no necesariamente ta refleha opinion di ArenaPoliti.co