ORANJESTAD - Parlamento a trata e presupuesto di Economia y Energia diaranson ultimo. Minister Mike de Mesa no por a contesta ningun pregunta riba e tereno di economia. Unico cos cu el a keda ripiti ta con economia di Aruba a desaroya tempo di Gobierno di MEP. 
Fraccion di AVP tambe a compañe den esaki y a keda constantemente den pasado.
Ta obvio cu Parlamentarionan di AVP no a studia e presupuesto y pesey no por haci pregunta riba e presupuesto y mester keda pega den pasado. 

MENOS CRESEMENTO ECONOMICO PA 2017 
Mientras tanto Banco Central a “downgrade” e cresemento economico di nos pais pa otro aña cu mitar, y esey mester ta motibo pa preocupacion. Pasobra segun Banco Central, economia di Aruba lo NO crese cu 6.1% manera Gobierno a pensa, sino cu apenas 3,4%. Pues e entradanan di Gobierno lo keda atras. Esaki ta hustamente locual cu Raad van Advies y CAFT a trece padilanti, cu ta haci e presupuesto ta asina irealistico. Un presupuesto irealistico por wordo aproba pa e 12 Parlamentarionan di AVP, pero cu e ta wordo firma pa Gobernador no ta sigur.

MIKE DE MESA CU NIVEL HOPI BAHO
Mientras cu Parlamentarionan a haci preguntanan hopi al caso pa Minister de Mesa riba diferente tereno, e Minister mes a dicidi di no contesta nan, pero aha na un nivel sumamente baho.
E Minister a lastra e Parlamentarionan di MEP na su smaak. Lansando hopi mentira, manera por ehempel cu MEP lo a yama hendenan pa criminal, siendo cu no ta berdad.

DUMP
MEP a enfoca hopi riba e problema di dump, cu ta un problema serio. Hasta a referi na veredictonan di Corte di Derecho Humano cu ta obliga Gobierno pa evita cu dump ta causa peliger pa bida di hende. AVP a boycotia e proyecto cu MEP a laga atras, un proyecto cu hues imparcial a declara cu e tabata un bon proyecto. Pero no kier a bin cu nada otro na su lugar tampoco. Minister de Meza no kier a contesta e pregunta, mientras cu habitantenan di e bario ta sigui biba den situacion cu ta pone nan bida na peliger.

REFINERIA
Hopi pregunta a wordo haci tambe tocante e refineria. Minister de Meza a contesta e preguntanan cu e frase "mi no sa", y "mi ta kere". E siguridad cu semper e tabata tin ora ta trata e refineria, e no a refleha e biaha aki. MEP a insisti pa trahadornan local haya prioridad na momento di haya trabou, y a entrega un mocion pa instrui Gobierno pa percura cu nos cuidadanonan haya preferencia.

ASBEST
MEP a cuestiona tambe e problema di asbest riba tereno di e refineria serca di casnan na Fort Heuvelstraat. Mientras cu e procedura cu Valero a aplica pa dera e asbest no a bai segun procedura, Minister de Meza a declara cu tur cos a bay bon. Un mentira! Pasobra ta conosi cu DTI nunca a duna aprobacion pa e trabou aki, y hasta kier a para e trabou pero di ariba a bin orden pa no stroba e trabou. Ta tristo con Minister de Meza a manipula Parlamento di e forma aki.

Minister de Mesa te ainda ta e minister cu a comporta su mes mas malo den e sala di Parlamento, ta parse cu e mester a tuma e papel di Otmar Oduber awor.

Expresionnan haci den e articulo aki no necesariamente ta refleha opinion di ArenaPoliti.co