Pueblo di Aruba, cu gran asombro mi por a tuma nota di e publicacion di PM Eman, unda cual gobierno di AVP ta bay honra e 2.147 firmantenan, kendenan tabata e pioneronan den e lucha di Status Aparte. 

Hende por ta falso, pero di e manera aki si ta pasa tur perspectiva. Por cierto, esaki ta otro prueba mas di cu PM Eman no por ta bon di cabes. Na prome lugar, e firmantenan a boga pa e lucha pa ta un dia baas den nos mesun cas, e famoso Status Aparte. Ironia di bida ta cu ta net AVP y Eman, kendenan a “start” e lucha, ta net AVP y Eman a desgracia dicho lucha tambe. Dicon? Pueblo mester bay den historia pa cuminsa cu e evaluacion corecto di AVP. Kico a pasa despues dia 18 di maart 1948? Despues cu e presentacion na Hulanda a wordo aproba unanimamente den Conferencia di Mesa Rondo? Cu consecuencia cu defunto Juan E. Yrausquin a bandona partido AVP. Den forma di traicion na e 2.147 firmantenan na Corsou, AVP a duna e apoderacion na Corsou di tin 12 asiento den Parlamento di Antias vs 8 asiento pa Aruba.

Ta AVP su representante (pariente directo di PM Eman) a firma e acuerdo aki. No ta di mas pa menciona cu AVP, despues di e traicion, a laga e lucha cay tambe! Ta defunto Betico Croes y MEP a lidera e pueblo pa a yega na culminacion di e lucha di e 2.147 firmantenan. Ta MEP e pueblo a duna mandato pa logra e Status Aparte.

Na di dos lugar, pa motibo di mal maneho di gobierno di AVP y PM Eman, Aruba a ricibi un KB (Koninklijk Besluit) pa para firmamento di presupuesto 2014. Baas den propio cas aki a cuminsa basha den otro. Na di tres lugar, e propio PM Eman ta firma un protocol cu minister Plasterk di Hulanda, na mei 2015, pa bin un supervision financiero riba país Aruba den forma di un ley. E mesun aña, dia 27 augustus 2015, e 13 Parlamentarionan di AVP a vota pro pa dicho ley pasa; kitando e poder presupuestario di e propio parlamento. AVP ta entrega parti di e autonomía di país Aruba destruyendo nos Status Aparte. Aruba ta bao curatela financiero di parti Hulanda! Pa esaki e 2.147 firmantenan a lucha y a kere aden, of pa un Aruba liber?

Den mi caso, ta tur dos mi abuelonan a firma, sr. Cayetano Franken y sr. Hermogines Maduro. Pues mi tin e derecho di papia y trece padilanti cu mi ta sinti mi ofendi, a base di e hipocrecia y manipulacion di parti AVP y PM Eman, cu e supuesto honra na nan. Mas bien ta berguensa AVP y PM Eman mester tin y pidi pueblo di Aruba pordon pa nan deficiencia den salvaguardia y conserva nos Status Aparte. Awor ta manera hende cu a perde tino, boso ta bin honra e firmantenan siendo ta traicion AVP y PM Eman a traciona nan lucha. Cu e honra di falsedad aki di parti AVP y MP Eman keda leu di mi famianan.

Expresionnan haci den e articulo aki no necesariamente ta refleha opinion di ArenaPoliti.co