Aruba Management Institute for Sustainable Tourism And Development awo ta un realidad

ORANJESTAD – Un siman particularmente importante pa e esfuerzonan cu nos pais ta haciendo den tereno di sostenibilidad a cuminsa dialuna mainta cu e apertura di e Forum Ehecutivo Internacional titular ‘Leading Sustainable Tourism in Latin America and the Caribbean.’ E honor aki a toca na Prome Minister Mike Eman kende a dirigi palabra na e grupo di lidernan di sector academico y turistico enfatizando e metanan cu Aruba a fiha pa su mes y un actualizacion di e progreso realisa te awe. E encuentro ta marca e lansamento di e organisacion Aruba Management Institute for Sustainable Tourism And Development.

AMISTAD ta un iniciativa di Prome Minister cu ta bira realidad danki na e patrocinio di Marriott International, expertonan local y internacional. E ta un sociedad publico/priva/academico entre Gobierno di Aruba, e corporacion hotelero y e institucionnan educativo Universidad di Aruba, The University of South Carolina y The Hague Hotel Management School. Su mercado ta bira Latinoamerica y Caribe cu un enfoke riba e innovacion y desaroyo sostenibel den turismo, biahe y hoteleria preservando e preservacion, promocion y profesionalisacion di e recursonan humano y natural.

Algun di e oradornan cu ta participando den e encuentro ta figuranan di renombre manera Profesor Dr. Sam Cole, director di e University of Buffalo, New York y un lider den e tereno di innovacion di sector turistico, como tambe nos propio Ewald Biemans, propietario di Bucuti & Tara Beach Resorts y reconoci varios biaha como empresario exitoso y innovador pa cu e agenda di sostenibilidad. Pa ambos, Minister President a pidi e sala duna un aplauso como muestra di aprecio y admiracion pa nan trayectoria y colaboracion.

E conferencia tin un duracion di dos dia y ta conta cu un programa yen di oradornan masha interesante for di Estados Unidos, Latinoamerica, como tambe nos mesun isla. Na final di su turno na palabra, Premier a expresa su satisfaccion grandi di mira con un idea cu un potencial asina grandi a conoce luz di dia pa cual el a gradici Sr. Bill Marriott y tur esnan envolvi.

Expresionnan haci den e articulo aki no necesariamente ta refleha opinion di ArenaPoliti.co