ORANJESTAD - Hans Biesheuvel ta un fiel creyente den e concepto di Aruba como Gateway entre e continente bieu y esun nobo, cual ta un iniciativa di Prome Minister Mike Eman y su Gabinete. Aña pasa el a participa den e prome conferencia di "Europe Meets the Americas" cu un delegacion MKB Nederland (Midden- en Kleinbedrijf) y despues a organisa na Hulanda e aña 'ki un pre-evento di e ‘Green Aruba - Where Europe Meets the Americas’ (GA-EMA), cu ta tuma luga for di 22 pa 24 di october awor.

Biesheuvel ta fundador di e organisacion "Ondernemend Nederland", cu ta un organisacion tin como meta apoyo di empresarionan na Hulanda. E organisacion apenas a cuminsa aña pasa september y ta ampliando rond Hulanda, ta activo na Brussels, pero tambe internacionalmente. E organisacion, el a enfatisa, ta brinda apoyo den e entrepreneurship, ampliacion di empresanan, y tambe ta bay lobby tanto na Den Haag como Brussels pa e sector aki.

Contrario na aña pasa e delegacion aki ta mas chikito, door cu e organisacion cu e ta representa tin otro metanan cu esun d MKB Nederland. E ta na Aruba principalmente pa reuni cu Prome Minister Mike Eman y mira con hunto por logra un miho cooperacion den Reino Hulandes, con pa conecta e empresanan den Reino miho cu otro. "Pues mi tin mas cu un meta pa ta presente aki na Aruba, pero lo ta den apertura di e Conferencia prome cu e bula bek pa Hulanda," Biesheuvel a comenta. El a agrega di a reuni tambe cu organisacionnan na Boneiro na Corsou.

‘Green Aruba - Where Europe Meets the Americas’, cu ta cuminsa awe, ta brinda un bon apoyo pa e organisacionnan den Reino, mientras cu ‘Green Aruba’ ta crea hopi oportunidad pa companianan, specialmente na Hulanda, pero ta haci Aruba un Hub pa empresanan di ambos continente."

E biaha aki lo tin varios empresa cu a yega di participa den e prome GA-EMA y ta spera pa sigura mehora e oportunidadnan cu e conferencianan aki ta crea.

Expresionnan haci den e articulo aki no necesariamente ta refleha opinion di ArenaPoliti.co