SIN MEDIDA 
STA.CRUZ – Lider di MEP Evelyn Wever-Croes den conferencia di prensa a elabora riba e situacion financiero di pais Aruba. 

FINANSAS PUBLICO TA UN PROBLEMA SERIO 
Lider di MEP a cuminsa cu splica con serio e problema financiero di Aruba ta, mirando cu e debe di nos pais ta actualmente 86% di e GDP. Berdad pa logra algo den bida, bo mester hasi debe, pero no asina hopi. Banco mes ta tene cuenta te cu 1/3 parti di bo entrada pa prestabo placa, no 86%. CAFT tambe a enfatisa cu lo dura 27 anja pa nos yega bek na e nivel cu MEP a lage na anja 2009.

VISION DI MEP: SIN MEDIDA 
MEP tin un plan con pa atende cu e situacion financiero di pais Aruba SIN medida. 
Prome paso lo ta baha gasto di gobierno cuminsando cu baha e cantidad di minister, corta den nan gastonan di biahe, fiesta, propaganda y abogado, y abo por scapa 70 miyon florin pa anja.
Di dos paso lo ta pa refinancia nos debe y baha e interes cu nos ta pagando awor, cu ta 200 miyon florin pa anja. 
Di tres lo ta pa desaroya nos economia di berdad, pa e placa keda aki na Aruba mes. Nos lo concentra riba varios pilarnan economico, pa asina yega na un cresemento stabiel di nos economia. Yuda hobennan pa desaroya nan propio negoshi, atraves di e Banco di Desaroyo. Pilar economico di IT, agricultura cria y pesca, turismo medico, turismo di arte, turismo deportivo. Tur esakinan nos lo desaroya pa percura cu economia lo draa. Negoshinan lo paga belasting y nos cuidadanonan lo haya un mihor trabou y lo paga belasting tambe e ora. 
Basa riba esakinan nos lo atende cu e problemanan financiero di Aruba SIN medida.

HAMAS ARIBA A CONOSE ASINA TANTO MEDIDA MANERA CU MIKE EMAN
Lider di MEP a musta un lista masha largo di medidanan cu gabinete Mike Eman a tuma contra pueblo, pa asina nan por a bai na 9 minister, y mas di 500 coordinador. “Hamas antes den historia di nos pais, Aruba a conose asina tanto medida y belasting nobo manera den e 8 añanan di gabinete Mike Eman. No solamente e 9 ministernan actual di e gabinete, pero tambe esunnan cu a bai, y hasta esun cu a bolbe. Nan tur ta laga atras e legacy di a introdusi mas tanto medida y belasting nobo den nos pais. MEP tin un plan y un vision, cu lo atende cu e tema financiero cuminsando serca e minister y parlamentarionan. Sin mester bin cu medida. AVP den 8 aña a abusa di pueblo, hasiendo gastonan enorme, y pone pueblo paga pa tur cos. MEP lo trese e alivio ey”, ta palabranan di Evelyn Wever-Croes, lider di MEP.

Expresionnan haci den e articulo aki no necesariamente ta refleha opinion di ArenaPoliti.co