HOPI DEBE DI BELASTING A CADUCA, BO MESTER TA ALERTA

SANTA CRUZ – Den conferencia di prensa di MEP Lider di MEP Evelyn Wever-Croes a elabora riba e tantisimo dwangschrift cu departamento di belasting ta repartiendo.

El’a enfatisa cu durante su bishitanan den bario, e ta topa tur biaha cu por lo menos 5 caso di cobranza cu a caduca.

“Mi ta bishitando cas pa cas den barionan y durante cada bishita mi ta wordo confronta cu famianan cu ta hayando hopi cobranza di belasting. Algo riba su mes hopi preocupante, pasobra ya caba hopi di nan no por cubri gastonan mensual, varios tin debe atrasa di awa y coriente, y algun te hasta no tin coriente. Anto awor ta wordo confronta cu cobransanan di belasting. Esaki ta kibra mi curason, especialmente di mira nos grandinan lucha cu e problemanan cu belasting.

Mi kier alerta tur hende riba un desaroyo preocupante: hopi cobranza a caduca caba y no mester wordo paga. Esaki por scapa bo hopi placa, si bo djis paga tino. Kiko bo mester hasi?

Verifica e fecha di e cobranza (“dagtekening”), y si desde e fecha ey 5 anja a pasa, e posibilidad ta grandi cu e debe a caduca. Solamente si desde e fecha di e cobranza e departamento a tuma accion pa cobra e suma, a manda dwangschrift of a pone beslag, ta pone cu e debe no a caduca. Pero mi ta topa varios caso di debenan a caduca, pero toch ta manda dwangschrift. Esey ta pasobra gobierno ta pone un presion enorme riba e departamento pa cobra.

No lubida cu gobierno di AVP a priminti CFT cu nan lo cobra 81 miyon florin e anja aki cu cobransanan atrasa, y asina ta un forma. Pero e no ta husto.

Kiko pa hasi den caso cu e cobranza a caduca?
Den caso cu e cobranza a caduca, bo mester manda un carta y avisa e departamento cu e debe a caduca, y cu bo lo no pag’e. Si bo mester di ayudo cu traha carta, nos ta semper dispuesto pa yudabo. Yama nos na parlamento pa hasi un cita y mesora nos ta prepara e carta pa bo. Paga belasting ta deber di nos tur, pero no paga dimas! Nos di MEP kier introdusi un sistema di belasting mas simple, pero mas cu tur mas husto. E maneho di gobierno di AVP aki no ta husto, Aruba merece mihor, mucho mihor”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co