Gobierno mester paga interes na e cuidadano, ora e tarda pa paga bek 

ORANJESTAD – Durante reunion den Parlamento, lider di MEP Evelyn Wever-Croes a cuestiona minister di finansas, con por ta posibel cu gobierno no ta dunando placa bek na cuidadanonan di belasting. Or abo mester paga, nan ta cobrabo mesora, pero ora mester paga bek, ta tarda masha largo mes.

“Den e cuentanan anual di 2013 nos no por mira ningun caminda cuanto placa gobierno mester paga bek na cuidadanonan. Aki mi ta referi na e placa cu mester paga bek di inkomstenbelasting. Minister no por a contesta esaki tampoco.

Tin un atraso grandi den duna hende placa bek, y no ta husto. Ora di cobra si gobierno ta cobra mesora pero ora di paga bek no. Na anja 2010 minister Mike de Meza a duna nos un planning cu e lo a keda cla cu e atrasonan den dos anja. Pero despues ela busca guera cu e hefenan di Directie y Ontvanger te cu ela core cu nan pa despues e hasi wega politico cu e departamento, reglando ‘kwijtschelding’ pa su amigonan. Pues e no a logra. Na anja 2014 minister Juan David Yrausquin a duna nos otro planning, cu lo keda cla e anja akin a mei te cu 2012, pero awendia ainda hendenan ta wardando nan 2010! Segun minister Bermudez, nan lo keda cla dentro di poco te cu 2012. Nos ta spera cu e biaha aki si gobierno cumpli, pasobra no ta husto. E cuidadanonan mester di e placa.

PAGO DI INTERES

Anja pasa na januari minister Yrausquin a priminti parlamento tambe cu e ta bai traha un ley den cual or abo tin cu haya placa bek, tambe gobierno ta bai paga bo interes. E ley aki lo a keda di wordo traha anja pasa ainda, pa drenta na vigor prome di januari 2016. Pero te dia di awe, nos no a tende nada. Esaki ta otro promesa falso? Ta birando tempo cu ora un cuidadano mester haya placa bek di belasting, e tambe tin derecho di haya interes riba e placa, mescos cu gobierno ta cobra interes ora e cuidadano debe belasting. Mi a pidi minister Bermudez pa traha riba esaki y cumpli cu e promesanan di su gobierno” Segun lider di MEP.

Expresionnan haci den e articulo aki no necesariamente ta refleha opinion di ArenaPoliti.co