Lider di MEP Evelyn Wever-Croes durante conferencia di prensa a reacciona den corto riba e sentencia di hues contra Diario, relaciona cu acusacionnan infunda contra su persona y contra su casa, cu Diario mester a rectifica. Hues tabata hopi fuerte contra Diario cu no a presenta ni un prueba, pero mas bien a cataloga Diario como un corant di redashi. Hues a conclui:  (1) cu NO tin nada di labamento di placa (lesa r.o. 4.9), (2) cu NO tin nada dudoso na e transaccionnan, simplemente pasobra nan ta pasa via banco, y banconan mes ta controla tur cos (lesa r.o. 4.7), (3) cu NO tin nada dusoso na e compañía menciona, pasobra ta forma normal di traha e ta, pues no tin nada di fantasma manera politiconan di AVP ta referi na dje (lesa r.o. 4.8), y (4) cu Diario no tin ningún prueba, otro cu e ‘screen-shot’ nan di banco, cu según hues ta manipula (lesa r.o. 4.6).

“Ami a dicidi di no cuminsa ningún caso tanten esun di mi casa ta pendiente, pa no bruha nada den su caso. Naturalmente Diario si a hinca mi persona den e caso di mi casa, pero ami mes a keda full full afo. Unico caminda cu mi nomber a wordo usa, ta pa referi cu Kenneth Wever ta casa di Evelyn Wever-Croes. Nada mas. Hues no a haya esey necesario, y mi ta kere pa awor tur hende sa cu Kenneth ta mi casa, pues pa nos tampoco esey ta necesario. Ami semper a bisa cu ora e caso di mi casa keda cla, ami lo evalua pa cuminsa dimi, y awor mi ta den e fase ey. Mi abogado a analisa e veredicto di mi casa y na su opinion profesional den e veredicto di mi casa e hues a duna su opinion riba tur e acusacionnan cu mi oponentenan ta lansa contra mi, y a bari tur for di mesa. Si e transaccionnan no ta dudoso pa mi casa, nan no ta pami tampoco, si no tin un compañía fantasma den caso di mi casa, e no ta fantasma pami tampoco y si no tin labamento di placa den caso di mi casa, mescos ta aplicable pami.

Segun mi abogado, tur e acusacionnan aki hues a bari for di mesa totalmente, pa mi casa, y e ora e ta conta tambe pa ami y pa mi tata. Ami no a pidi hues un cabey boto manera un parlamentario di AVP a bisa, pero mi a haya e cabey boto ey si, sin pidi! Pasobra tur duda a wordo aclarea den e veredicto.

E unico cos cu mi oponentenan ta sigi riba dje ta cu ami tin entrada adicional aparte di mi salario como Parlamentario, algo cu no ta corecto. Ademas, si en caso e ta corecto mes, mester corda cu e ‘versoberingswet’ no ta stroba un Parlamentario tin entrada. Simplemente si un parlamentario tin entrada di trabou, e mester declara esaki na Parlamento. Si e parlamentario tin otro entrada, por ehempel dividend, e no mester ni declara esaki y nada ta strob’e di haya esaki. E “versoberingswet” a wordo traha pa acomoda ministernan manera Mike de Meza, Richard VIsser y Juan David Yrausquin cu tabata tin shares den nan companianan y por a sigi ricibi miyones mes, sin mester declara esakinan na Parlamento. Mescos ta conta pa parlamentarionan cu ta huur nan cas na un speelschool. E tambe por cobra cuanto cu e kier, y no mester declara esaki. Sin embargo ningun di esaki ta aplicable riba mi persona pasobra ami no tin otro entrada.

Mi ta conseha e politiconan pa studia nan leynan mihor, pasobra ta un berguensa cu politiconan cu mester sa mihor, ta sigi difundi redashi” según líder di MEP, Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co