Diadomingo dia 8 di maart Forsa femenino Grace di partido MEP a organisa un encuentro na Indian Rock Garden pa celebra Dia Internacional di Hende Muher. Durante un celebracion ameno, a pone e ser femenino central. Di ora cu e huespednan tabata yega, y wordo saluda cu un bunita rosa, saca potret cu lider di MEP, y wordo acompanja na nan mesa, nan por a sinti cu e anochi ta bai bira hopi especial.

Sandra Brown, directora di CEDEM, a duna un charla pa duna hende muher mas forsa y curashi den educacion di nan yiunan, y den su propio palabra, pa recorda cada mama cu e mester ta un mama ferfelo tin biaha.

E di dos orador, Mimi Rosel, directora di Radio Bo Guia, tambe a enfoca durante su charla riba e importancia pa hende muhernan den famia duna guia, especialmente den e temponan dificil nos dilanti.

Aparte di e dos charla nan sumamente interesante, tabata tin tambe poesia di Clarette Quandus y di Isa Brown, riba e papel importante di hende muher. Isa Brown a declama tambe un poesia dedica na Betico Croes, den felis memoria.

Na fin di e anochi tanto Xiomara Ruiz-Maduro como Evelyn Wever-Croes a duna un charla cu tambe a cai den masha bon tera serca esnan presente. Xiomara a enfoca riba e origen di e fecha importante aki, y a elabora tambe riba e retonan di ta un parlamentario femenino. Especialmente referencia na e insultonan di un minister recientemente, den cual a yam’e pa olifanti. “Si un hende yamabo pa olifanti, lanta para y bati man p’e, pasobra e ta reconose den bo un ser cu un habilidad hopi grandi pa stima, y mes momento cu ta avansa firme den bida cu pasonan aplastante”.

Evelyn Wever-Croes a papia di e retonan cu hende muhernan tin, y con pa carga nan cu gracia. “Ser hende muher no ta facil, nos mester pensa manera un hende homber, actua manera un dama, mustra bunita manera un hobencita, y traha duro manera un cabay. Pero nos no tin problema pa hasi esey, nos ta fuerte; un hende muher ta manera un saco di te, bo no sa con fuerte e ta te ora bo pone den awa cayente”.

Un anochi sumamente exitoso, den sala yen yen di Indian Rock Garden, y cu un publico masha entusiasma, cu a gosa henter e anochi. Partido MEP y Forsa Femenino Grace ta e unico partido politico cu tin 12 anja ta celebra e fecha aki, y a sa di pone e ser femenino central. Pabien!

Expresionnan haci den e articulo aki no necesariamente ta refleha opinion di ArenaPoliti.co