Segun Ley di Comptabilidad e presupuesto di nos Pais mester wordo entrega promer cu 1 di september di e aña presupuestario. Pues segun Ley e presupuesto di 2015 mester a wordo entrega na Parlamento di Aruba promer cu 1 di September 2014. Pero enbista di tur e drama di welga di hamber di nos Minister Eman, e presupuesto di 2014 mes a mira luz te na fin di aña 2014 y pesey no por a traha riba presupuesto 2015 manera debe ser. Tur e tardansa aki a perhudica comercio y e Pueblo di Aruba cu no por a conta cu pago y tampoco cu servicio di Gobierno. Tur cos ta mustra cu presupuesto 2015 tambe lo conta cu e mesun suerte. Ya caba 6 luna ta pasa bay y e presupuesto no a keda presenta na Parlamento y riba dje atrobe tin confrontacion cu Hulanda cu ta trece mas tardansa cune.

Mester busca moda pa implementa medida
Parti di e tardansa aki ta wordo ocaciona pa e ehercicio cu e diferente Ministernan di Gabinete Eman mester haci pa corta den gasto pa asina por cumpli cu e plan pa drecha finanzas publico cu nan mes a priminti na CFT. Ta trata di e implementacion di e 24 medidanan. Ya caba na 2014 tabata tin hopi problema entre e ministernan ya cu ningun no kier a corta den gasto di nan ministerio. Pero no tin mucho tempo mas, placa ta caba y e precion di Hulanda cada dia ta bira mas grandi.

Minister Bermudez no por su so
Manera CFT a trece dilanti den su rapport di 29 di December 2014, Minister Bermudez su so no por cu tur e trabou. E mandatario mester e sosten di su otro colleganan y principalmente di Minister Eman kende tabata desconecta pa basta dia di su ministernan y no tabata coopera. Pero awor no tin espacio mas y Hulanda ta poniendo precion grandi pa Minister Eman asumi su responsabilidad di goberna e Pais aki debidamente y cumpli cu su mesun plan y palabra.

Pueblo y comercio perhudica
Cada dia cu pasa cu nos Pais no ta conta cu un presupuesto aproba pa Parlamento, e Pueblo y comercio ta wordo perhudica. Sin presupuesto aproba, gobierno no por haci inversion, no por paga comercio debidamente y no por ofrece servicio optimal na e Pueblo. E falta di pago na hopi ocacion ta trece companianan den problemanan serio y hasta por trece kiebro cune. Y Pueblo tambe ta keda perhudica ya cu por ehempel sin placa, Gabinete Eman no por restitui e placa di belasting cu hopi ta spera riba dje. Tur esaki por a wodo evita si Gabinete Eman a hiba un maneho financiero responsabel y sikiera por a conta cu un presupuesto aproba promer cu aña 2015 a habri.


10 maart 2015

Expresionnan haci den e articulo aki no necesariamente ta refleha opinion di ArenaPoliti.co