ORANJESTAD – Den ultimo temponan e minister di ensenjansa ta hopi den lus publico negativo pa su decisionnan equiboca cu e ta tuma.

KUDAWECHA
E problema cu a surgi na e scol di Kudawecha, na unda e Minister ‘herself’ a manda suspede un maestra, imponiendo cantidad di sanccion adicional, ta djis pasobra e minister a bai tras di un mayor cu ta su campanjador politico. E accion aki di e Minister a causa cu demas maestronan, mayornan studiantenan y SIMAR a lanta contra e Minister y e caso a yega te Parlamento di Aruba. Den Parlamento di Aruba a resulta cu ya e cabesante di e scol a atende cu e problema na scol, y pues e Minister no tabata tin nada mas di hasi den e caso aki. E caso aki ta sigi den Corte, y e berguensa pa Michelle Hooijboer-Winklaar lo ta grandi ora e haya tende di un hues imparcial, cu e ta WRONG AND STRONG.

SKOA
Pero e Minister su problema no ta Kudawecha so, pasobra e minister a busca problema tambe cu SKOA. Gobierno debe SKOA miyones di florin y SKOA na su turno a bai pidi mayornan pa paga mas schoolgeld. Algo cu mayornan no a acepta y a cuminsa un caso contra SKOA, y e caso SKOA vs Gobierno tambe ta den corte. Minister Hooijboer ta WRONG AND STRONG: dicon no simplemente paga SKOA loke Gobierno debe, y cos ta soluciona?

SMOA / COLEGIO ARUBANO
Y manera cu no ta suficiente e Minister a bai mete directamente den SMOA y no kier pa Colegio Arubano yena e vacatura cu Withney Kock a laga atras. Manera tur hende sa, Withney Kock ex politico di AVP a haya un promocion sin precedente na momento cu el’a wordo nombra como director di Scolnan Publico. Por a nota sinembargo cu den su prome tarea, el’a faya barbaramente, mustrando cu e no tin e capacidad pa e funcion ey, pasobra sino nunca e problema na scol di Kudawecha por a escala asina tanto.  Y riba dje Minister Michelle Hooijboer no kier pa Colegio nombra otro con-rector na su lugar, probablemente pasobra el’a priminti Kock cu e mes lo bai bek Colegio. SMOA a hiba e minister Corte y e minister a perde mahos dilanti mesa berdad.
Awor pa colmo a redusi e presupuesto di Colegio Arubano cu 2 miyon florin, y asina no ta duna Colegio Arubano e tools pa por cumpli cu exigencianan pa reconosemento di diploma di HAVO y VWO. Minister Hooijboer no tin fin di soluciona e impasse aki, y asina ta perhudicando nos studiantenan.

Ta ki dia Minister Michelle Hooijboer-Winklaar lo realisa cu su trabou ta pa traha den BIENESTAR di nos muchanan, y no pa PERHUDICA nos muchanan. E ministerio di ensenjansa ta na candela, y pa colmo ni minister Dowers ni Brandweer por bin yude paga e candela pasobra nan a corta den presupuesto di Brandweer.

Expresionnan haci den e articulo aki no necesariamente ta refleha opinion di ArenaPoliti.co