‘Burico ta traha pa Cabay Come’ 

Asunto interno: Diamars 29 di september 2015, Parlamentario di AVP, Melvin Tromp, ta mete den asunto interno di MEP y ta yama tur candidato pa cobarde. Su persona ta kere cu pasobra el’a apoya su lider traidor pa laga Hulanda mete den Aruba su asunto interno, awor e por mete den esun di MEP.
Aclamacion: Conseho di Partido, despues di a sondea candidato pa liderzago, a propone na Congreso di MEP, pa aclama sra. Evelyn Wever-Croes como Lider. E proceso democratico a wordo encamina. Aclamacion ta un manera di vota y Congreso a bay di acuerdo.
Sinberguensa: Libertad di expresion no ta permiti ningun hende pa insulta nos pa cobarde. Coincidencia ta cu exactamente un aña pasa, 29 di september 2014, un acto di cobardia a tuma lugar den Parlamento, riba iniciativa di Parlamentario Dammers. Aki ta unda cu den 6 minuut, 13 Parlamentario di AVP a previlegia nan mes cu Bashi premie y Gelijkbedrag. Marisol a bisa cu e ley aki ta un hamerstuk. Mientras tin medida pa pueblo henter, boso manera ladron den anochi kier previlegia boso mes.

Cobarde: Pami cobarde ta ora cu Vice-Presidente di Parlamento ta dal auto di trabao, marduga ora e no ta traha y no ta yama polis. Loke si e ta haci ta hib’e na compania di auto di friends & family, pa laga drech’e den silencio.
Presion di pueblo: Bou presion di MEP y cu sosten di pueblo e ley aki no a wordo ‘afgekondigd’, pues no a bay na vigor.
Cobardia ta sigui: Despues di a traiciona e lucha sagrado di Betico y su pueblo, esta su autonomia, riba 27 di augustus 2015, otro acto di cobardia a tuma lugar. Traidor Mike, cu ayudo di Marisol a contamina un lugar di crimen. A core verf dilanti y paden di Parlamento y no a warda pa polis a haci investigacion di ken ta esun cu a tira. A wordo tira for di den Parlamento y deliberadamente e sitio a wordo contamina, door di a verf.
Nos lider: Den Congreso nos Lider a bisa entre otro cu lo baha edad di pensioen di 65 pa 62 aña, lo elimina ley di CAFT (y tur su medidanan) y a cuminsa encamina e caminda internacional pa recobra nos autonomia financiero bek. Su persona a entrega dos tremendo mocion: 1. Pa IMSAN bira un hospitaal pa San Nicolas y vecindario y 2. pa bini cu un policlinica na Paradera, pa Paradera y vecindario. Pa Noord y vecinderio mester bini e scol pa Havo/Vwo pa asina duna mas hoben un oportunidad honesto pa sigui studia. Aki nos Lider ta mustra cu mester tene cuenta cu hende su situacion financiero, su salud y mas cu tur el’a demostra cu e hende ta y mester keda central den tur Gobernacion.

Expresionnan haci den e articulo aki no necesariamente ta refleha opinion di ArenaPoliti.co