Den medio di prensa Parlamentario, sr. Guillfred Besaril y fraccion di MEP, a tuma nota di un comunicado di e vocero di Cuerpo Policial, caminda su persona a informa comunidad Arubano cu dentro di poco departamento di trafico di Cuerpo Policial lo traspasa e responsabilidad na atende accidentenan di trafico cataloga como “blikschade” pa sector priva.

Parlamentario Besaril ta di opinion cu e Minister responsabel pa mantencion di nos leynan di trafico mester haci entre otro un investigacion profundo di e situacion prome cu e pasa dicho responsabilidad den man priva. Tambe ta na su luga pa e mandatario duna un splicacion amplio tanto na Parlamento como na comunidad.

E Parlamentario ta bisa di no ta necesariamente contra e decision aki. Na Corsou e sistema aki ta funcionando pa varios aña caba. Tin acuerdonan entre Gobierno, companianan di Seguro y entre otro Curaçao Roadservice, cu ta garantisa e profesionalismo y transparencia necesario. Sr. Besaril ta haña mas bien cu ni Parlamento mucho menos Pueblo no a wordo debidamente informa di e cambio di maneho, ni kiko tur e cambio aki lo trece cune.

Fraccion di MEP durante tratamento di presupuesto 2016 a entrega un mocion urgiendo Minister di Husticia pa suspende e introduccion di e cambio te ora cu tur protocol ta firma y e responsabilidad di tanto Cuerpo Policial como e compania of companian priva, cu lo atende cu dalmento di auto (blikschade) na Aruba, keda bon defini. Apesar cu e mocion aki no a conta cu e sosten di e fraccion berde den Parlamento, fraccion di MEP ta spera en todo caso cu e introduccion di e maneho aki bai den un forma bon planifica den cual lo por garantisa Pueblo primeramente imparcialidad y ademas tur informacion necesario.

Expresionnan haci den e articulo aki no necesariamente ta refleha opinion di ArenaPoliti.co