Remigio Wever: Porvenir di Aruba, ....Nos porvenir (parti 2)
CON PREMIER RUTTE, PLASTERK Y MIKE EMAN TIN PENSA DI PONE UN FIN NA E STATUS APARTE DI ARUBA.
Den mi articulo anterior mi a trata na describi un poco e modus operandi di Hulanda pa nan por yega na e punto unda prome minister Mike Eman lo por entrega nos Status Aparte, cu a ser logra cu asina hopi sacrificio, bao guia di Betico Croes, den feliz memoria.
NOS STATUS APARTE Y BETICO CROES, DEN FELIZ MEMORIA.
For di aña 1971 Betico Croes mester a lucha hopi duro pa finalmente, por cierto cu masha hopi esfuerso y sacrificio personal, logra realisacion di e Status Aparte di Aruba entrante 1 di januari 1986.
Ta conoci cu Hulanda NUNCA a pordona Betico pa esaki!
Hecho ta cu nos Status Aparte a trece cu ne, cu Hulanda a perde su influencia y poder pa tuma decisionnan pa cu Aruba, y esaki nunca Hulanda a “aprecia”; p’esey tambe nos Status Aparte semper tabata - y ta ainda – un sumpiña den wowo di Hulanda.
1 JANUARI 1986
Esaki ya caba por a wordo constata inmediatamente despues di 1 di januari 1986, ora cu e prome gobierno di Aruba den nos Status Aparte, esta esun di Henny Eman, a sinta.
Pleito- y conflictonan serio encuanto e funcionamento di Ministerio Publico cu procurador-general J. Zwinkels y fiscal mayor Van Eck; labamento di placa di droga; hefe di mafia Spartaco Ghini di e compania di construccion Sicel y e proyecto di hotel BETA; e buki “Bloedsporen”, e raport De Ruiter; e famianan Mansur, Arends, Harms y Habibe, y un minister di Husticia corupto cu a wordo premia cu un KB ….. no ta nada straño cu e rabia di Hulanda a yega na su maximo.
Pero e rabia ey a sigui contra e gabinetenan di Nel Oduber tambe.
Nel Oduber y su gobierno a wordo tuma especialmente masha na malo cu nan no tabata mucho “amigo” cu Hulanda, y continuamente tabata busca problema cu e gobierno di e pais madre.
Cierto momento na 2014, despues di e welga di hamber extravagante di Mike Eman, Hulanda porfin a dicidi cu awor si tabata basta (“TA BASTA!”) cu e Status Aparte di Aruba, y cu e status aki lo mester wordo entrega y cambia pa algo otro.
Hasta na St. Maarten y Corsow, Hulanda tin mas di bisa cu na Aruba.
E status di Corsow y St. Maarten ta diferente na esun di Aruba, pa motibo di e acuerdonan completamente otro cu a ser haci cu e paisnan ey, unda ainda Hulanda tin hopi di bisa riba tereno di maneho di bon calidad, finanzas publico y hudicial, y esaki a cambio di e saneamento di debenen (“schuldsanering”) riba 10 di october 2010, e conocido 10-10-10.
ANDRE BOSMAN Y RONALD VAN RAAK
Ya pa basta tempo caba nos a bin ta tende parlamentarionan Hulandes manera Andre Bosman (di VVD) y Ronald van Raak (di SP) vocifera nan preferencia pa forza Aruba, Corsow y St. Maarten den un construccion/constitucion di un mancomunidad (“Gemenebest”), pasobra Hulanda ta constata cu tur tres pais ta bayendo perdi y ta cabando na nada, pa motibo di corupcion, faboritismo politico y maneho malo riba tereno di finanzas; y Hulanda ta di opinion cu no por impone bon gobernacion si e gobernantenan di e paisnan aki mes NO kier esey.
P’esey tambe e deseo pa un Mancomunidad (“Gemenebest”), un modelo unda e paisnan Aruba, Corsow y St. Maarten por solicita ayudo ora nan mes ta considera esey necesario, y Hulanda lo por duna e ayudo ey, pero bao di condicionnan cu Hulanda mes por impone.
Fuera di esey e paisnan mes lo por determina nan propio futuro, completamente bao di nan propio riesgo y pa nan propio gasto, pero Hulanda ya lo no ta responsabel mas ni pa mal gobernacion, ni pa fraude, ni pa corupcion!
MIKE EMAN, MANCOMUNIDAD Y E STATUS UPG.
Ta masha cla y bisto: Hulanda no kier e islanan fastioso ey mas, pasobra ta problema so nan ta trece p’e.
Y Hulanda, bispou, a sera un deal cu Mike Eman, pa yude satisface su dos necesidadnan mas grandi, esta:
1). Mas liher posibel bira mas rico posibel,
y
2). Bay den e bukinan di historia como e salbador di Aruba, esta e homber cu ta scapa e comunidad Arubano for di e problemanan financiero y e peso di e debenan enorme di Pais Aruba.
E deal ta cu Aruba, cu ayudo di Hulanda, ta bati bancarota; Hulanda, manera bon mucha asina, ta bira cara mientras Mike Eman ta culpa e crisis internacional di 2007, e globalisacion, e situacion malo di economia di Merca, di Venezuela, di Colombia y di Brazil, pero tambe e competencia mortal creciente di Cuba den turismo, pa e actual problemanan financiero di Aruba.
Remigio A. R. Wever, 42.10.01.44
(e ta sigui)
Expresionnan haci den e articulo aki no necesariamente ta refleha opinion di ArenaPoliti.co