Remigio Wever: Porvenir di Aruba, ....Nos porvenir (parti 3)
CON PREMIER RUTTE, PLASTERK Y MIKE EMAN TIN PENSA DI PONE UN FIN NA E STATUS APARTE DI ARUBA.
PROME MINISTER MIKE EMAN TA BIRA E HEROE NACIONAL.
Ora necesidad a yega su maximo, y e caha di placa di Pais Aruba a wordo sakea te na e ultimo debchi door di e gobierno aki di AVP, y ningun hende riba Aruba ya no tin ningun cen mas – cu excepcion claro di e amigonan, e famia y e sponsornan di Mike Eman – e ora ey numa Hulanda lo bay sanea y re-financia nos debenan cu e interes abou di 1 ½ porciento, pero e ora ey Aruba lo bira parti tambe di e “Gemenebest” nobo; bo a “catch”?? Y Hulanda contento y orguyoso di a logra!
E ora ey Mike Eman lo drenta historia como e salbador di Aruba, pasobra ta E tabata esun cu a libra Aruba di e peso grandi di debe cu – esey e ta desea pa pueblo kere - NO a ser causa door di su fraude y corupcion, pero cu tabata consecuencia di e crisis internacional.
E ora ey Hulanda lo a scapa y lo a libra pa semper di e teimamento y e miseria di e islanan.
Esey Hulanda por logra unicamente cu Mike Eman, pasobra Hulanda sa masha bon mes cu algo asina e NO por logra cu un gobierno por ehempel di MEP; ta p’esey e sosten y apoyo asina grandi di Hulanda pa Mike Eman.....bo ta comprende?
Esey ta splica tambe pakiko e interes abao di 1 ½ porciento no por ser duna awor aki ainda: Aruba mester bati bancarota prome, y e Status Aparte mester ser entrega y cambia pa un “Gemenebest”. Nomas despues cu esey a sosode, e interes por baha te 1 ½ porciento!!
ARUBA DEN UN “GEMENEBEST” CU UN STATUS UPG.
Y awor, kiko ta sigui despues?
Un Aruba manera un segundo Haïti: un Aruba, unda - mescos cu tabata e caso anteriormente den nos historia - e habitantenan elegido y privilegia di Oranjestad ainda tin un bida relativamente bon, pero unda e hendenan senciyo y simpel di cunucu y di mondi na Santa Cruz, Savaneta y San Nicolas lo haya nan mes obliga di bay mendiga pa asina trata na sobrevivi.
Y TUR HENDE ta cooperando cu e soño ey di Hulanda, hasta Representacion di Hulanda na Aruba (“Vertegenwoordiging van Nederland op Aruba – VNOA”), Andre Bosman, Ronald van Raak, Age Bakker, CAft, e director di Kabinet di Gobernador, Ministerio Publico; nan ta gruña un poco si contra Mike Eman, pero esey ta djis un tiki comedia, pasobra mester keda na paz cu Mike Eman pa por realisa e idea di un Gemene Beest,….sorry, un Gemenebest, un mancomunidad!
Premier Rutte ta sigui firma bay pa mas Green Corridors, pa proyectonan PPP nobo, y pa comunidadnan “SMART”; Rutte ta permiti tur cos, pasobra mas placa Mike Eman kier presta y derocha, mihor!
Basta Aruba bati bancarota y perde su Status Aparte liher, y bira un pida Gemenebest, duuushi asina!
Y e ora ey Mike Eman mag di pronk y broma cu ta E ta esun cu a resolve e crisis financiero y e peso di e debenan, y cu awor Aruba tin lasonan directo cu Union Europeo danki na e modelo di mancomunidad.
Mike lo bay trata na splica Aruba henter cu awor cu Aruba tin e status UPG (Ultra Perifeer Gebied), y como tal ta forma parti integral di un pais miembro di Union Europeo, nos ta librá di tur metemento inhusto door di Hulanda, especialmente riba tereno financiero.
Mike lo splica tambe cu ta danki na E, cu Aruba ta baas den su mesun cas atrobe,
y cu awor Aruba tin acceso directo na capital Europeo, pero tambe na inversionnan Europeo den nos economia!!
Pakiko, bo ta kere, cu Laurens Jan Brinkhorst, e consehero hopi bon pagá di Mike Eman na Hulanda, ya a describi e scenario aki den e “Financieel Dagblad” na Hulanda?
Exactamente! Ela haci esaki riba instruccion di Mike Eman; e brainwashing di e comunidad Arubano pa cu e grandioso plan di rescate aki di Mike a cuminza caba, tanto na Hulanda como na Aruba mes tambe!
Y naturalmente lo bo puntra con ta para cu e futuro explotacion di gas: Hulanda ta keda sin haya tur e ganashi for di e explotacion di gas?
No laga ningun hende gañabo ni tumabo haci: e interesnan den gas di Hulanda, di Shell y di Repsol a wordo sigura dia bieu caba, y dia bieu a wordo firma pa esaki caba, bo por ta sigur di esey!!
Esey tambe mester tabata parti di e deal entre Mark Rutte, Ronald Plasterk y Mike Eman.
Di berdad, bo mester admira e mentalidad VOC aki di Hulanda!
Petje af!!
Pero, den tur esey, kiko Aruba mes ta pensa di haci pa no perde, ni entrega nos STATUS APARTE?
Pueblo di Aruba ta laga esaki pasa “just like that”???
Corda cu tabata danki na e decision di PUEBLO di Aruba, cu dia 1 di januari 1986 nos a drenta nos Status Aparte! Cualkier intencion pa un cambio den nos structura estatal TAMBE lo mester wordo poni na huicio di Pueblo.
Mescos cu a socede cu nos Status Aparte, asina tambe PUEBLO lo mester dicidi riba su futuro mediante un REFERENDUM!
Y e referendum aki mester bini mas liher posibel, pa nos NO wordo pusha den un status UPG!!
Remigio Wever, 42.10.01.44
Expresionnan haci den e articulo aki no necesariamente ta refleha opinion di ArenaPoliti.co