Ta hopi tristo pa durante di tratamento e siman aki di diferente reunion den nos parlamento por scucha algun Parlamentario di AVP cu pa con tristo e por zona, pero no sa nan trabao of talvez nan mester baha man na consumo di demasiado koffie pasobra cafeina tambe ta un sustancia cu por ponebo bira demasiado hyper te hiba bo den alucinacion. 

Trabao di parlamentario 
Un parlamentario ta huramenta pa haci su trabao como Parlamentario, pa controla e Gobierno (ministernan) riba nan maneho den nan ministerio. Parlamentarionan ta huramenta di ta fiel den nan trabao den nomber di Dios. Parlamentarionan tin di respeta e organo di mas halto di nos pais cu ta nos parlamento y ta respeta su trabao y ta respeta tur su coleganan durante tur e reunionnan. Por debati fuertemente riba situacionnan pero sin atakenan personal of cu lenguahenan menos bunita. Palamentarionan no ta huramenta pa por uza palabranan insolente y mucho menos palabranan di menasa. Presidente di parlamento ta huramenta pa hiba un maneho riba un nivel di maneha tur reunion y tur colega. Presidente di Parlamento tin poder di por pone ordo, saca un parlamentario of minister of cualkier persona cu no cumpli cu reglanan den nos parlamento afor si ta necesario. Presidente di Palamento mester hiba un control cu cada lider di fraccion riba comportacion menos bon di cualkier parlamentario cu no ta cumpli pa loke el a huramenta.

Loke a tuma lugar
Durante tratamento den parlamento e siman aki por a scucha diferente Parlamentario di AVP papia cosnan sin pia y sin cabes. Otro ta keto bay pega den pasado mientras tin varios di nan cu no sa mes unda nan ta enbes di controla e ministernan encuestion. E situacion y caso mas horibel ta parlamentario Clarisca Velasquez cu francamente e persona aki no tin ni respet pa Presidente di Parlamento, ningun minister, ningun colega parlamentario y mucho menos e pueblo di Aruba cu ta sigui e reunionnan aki via medionan di comunicacion y personal. Clarisca tabatata grita manera alma malo y a menasa Sra. Evelyn Wever-Croes y cu e ta dispuesto pa pasa otro banda di sala y pa bay agredi Sra. Croes fisicamente mes si ta necesario. Clarisca talvez ta kere cu e ta den un warda di Polis of ta den un otagon di UFC? Pasobra cu mi sa te hasta den nos wardanan di polis ta pone ordo di hefenan riba cualkier menasa asina. Te hasta durante peleanan di UFC tin un refree pa pone ordo. Ta con nos Presidente di Parlamento ta acepta esaki sin mas y no ta straf e parlamentario aki y pone su cabes na waterpas? Segun Clarisca a declara cu otro eleccion e lo no ta riba lista mas y ta retira di politica. Wel un bon sugerencia na Clarisca, tuma e derecho y libertad cu bo tin como hende y tuma bo retiro di awor caba, pasobra bo ta un berguensa pa nos parlamento, nos comunidad Arubano y mas ainda pa e ser femenino.

Expresionnan haci den e articulo aki no necesariamente ta refleha opinion di ArenaPoliti.co