1. No ta corecto cu un persona a haya tereno di 90 mil meter cuadra di e minister actual. Esaki ta contradeci e acusacion di MEP cu e minister lo a duna un persona tanto tereno. Minister a splica cu tur hende por pidi tereno y si cumpli cu e exigencianan ta haya tereno. Ken cu e ta. No ta wak color politico. Ta pesey miembronan di fraccion di MEP mes y nan famia tambe a haya tereno  grandi cada un di 1000 meter cuadra di e minister actual.

2. No a duna aprobacion pa 600 camber "all inclusive" na Holiday Inn. E hotel aki mester wordo renoba, pero e minister actual a informa e doñonan di e hotel tres siman pasa cu nan no ta haya permiso pa traha cambernan pa "all inclusive".

3. Oposicion a bolbe lansa e acusacion cu gobierno di AVP lo a malgasta y boyoctea e proyecto di procesa sushi na Prikibos cu gobierno di MEP a cuminsa. Minister Benny Sevinger a mustra cu:

• E proyecto di gobierno di MEP no a cumpli cu e exigencianan pa procesa sushi na Aruba. E compania cu MEP a duna e proyecto no tabata tin experiencia den proyectonan asina. Tog MEP a duna nan e proyecto cu den prome fase a costa 27 miyon florin. Ora AVP a drenta gobierno a stop e didos fase di e proyecto cu lo a costa otro 27 miyon florin.
• Gobierno a hiba e compania corte pa no mester paga nan pa e mal proyecto, pero huez a dicidicu mester paga e compania pamotibo cu MEP ya a aproba e proyecto.

4. Basa riba peticion di sector priva mes, a introduci reglanan pa organisa paramento di auto den centro di ciudad. Gobierno a introduci un sistema di para auto. Di tempo pa tempo ta evalua con e plan aki ta funciona. A base di esey ta trece cambionan necesario. Esey ta bay sosode awor aki atrobe. Entre otro a dicidi recientemente cu despues di 3'or atardi paramento di auto den centro di ciudad lo ta gratis.

5. E proyecto grandi di "Green Corridor" ta ontime! E no tin retraso. Tampoco e ta bay costa mas. E suma total ya ta acorda. Sin tin cualkier trabou extra of costo adicional, esaki ta core pa cuenta di e contratista manera ta poni den e contract.

E reunion aki cu minister Benny Sevinger den cuadro di tratamento di presupuesto, tambe a mustra con mal prepara y desorienta e fraccion id MEP ta. Nan a haci poco pregunta y tabata mas ausente cu na Parlamento. Anto ta e fraccion di MEP ta keha cu nan no a haya suficiente tempo y cu nan derechonan como miembro di Parlamento ta wordo trap'a. En realidad nan mes no ta ni yega trabou.

Expresionnan haci den e articulo aki no necesariamente ta refleha opinion di ArenaPoliti.co