ORANJESTAD -- Lider di MEP Evelyn Wever-Croes, hunto cu parlamentarionan Xiomara Ruiz-Maduro, Chris Romero, Dangui Oduber y Guillfred Besaril a reuni cu secretaris, president y miembronan di board di Camara di Comercio.
Regularmente e parlamentarionan di MEP ta reuni cu Camara di Comercio pa scucha e preocupacionnan relaciona cu desaroyo economico den nos pais. E temanan cu a wordo elabora extensamente riba dje ta entre otro e impasse di "all inclusive" cu tin entre e minister di turismo y e gremionan principal di turismo. Tanto e parlamentarionan di MEP como Camara di Comercio ta comparti e preocupacion pa cu esaki, y a intercambia cu otro riba diferente aspecto di e ley aki.
Un otro tema hopi actual ta e situacion den centro di nos cuidad, a consequencia di e introduccion di parkeermeters. Camara di Comercio ta hopi preocupa pa cu esaki, y tambe tin pensamentonan con por alivia e situacion.
E tema di criminalidad tambe a wordo trata extensamente, pasobra e situacion insigur di nos pais ta afectando comercio tambe severamente.
"Nos tabata tin un bon reunion cu Camara di Comercio, y nos ta hopi agradesido pa e forma constructivo y habri cu nos por intercambia di idea. Camara di Comercio tin bon ideanan pa trese solucionnan den nos pais. Nos tin cu traha hunto pa logra nan", Evelyn Wever-Croes a duna di conose. 

Expresionnan haci den e articulo aki no necesariamente ta refleha opinion di ArenaPoliti.co