Den grupo di 7 tin votador di tur partido, inclui votador di AVP 

ORANJESTAD – Lider di MEP Evelyn Wever-Croes a tuma nota di e atakenan nobo di politiconan di partido AVP. Pa falta di argumento y pa desvia atencion awor nan unico ataque ta cu Grupo di 7 ta un grupo di MEP.

Lider di MEP ta haya cu esaki ta mustra e debilidad den e politiconan di AVP. “Bo por kere cu mirando cuanto problema tin den nos comunidad y den gobernacion, anto unico cos cu nan sa hasi ta skibi cantidad di articulo cu Grupo di 7 ta un grupo di MEP?

Enfaticamente mi ta ripiti, Grupo di 7 no ta un grupo di MEP. Esnan cu bo ta wak den Grupo di 7 ta hendenan cu ta capas y dispuesto pa carga nan propio responsabilidad, no tin necesidad pa tene ningun otro hende responsabel pa nan actonan. Ta bon pa e politiconan di AVP bai enfrenta nan tambe, en bes di colga na saya di MEP cada biaha, según e líder di MEP.

Den Grupo di 7 tin votador di TUR partido político na Aruba: di PPA, UPP, PDR, MEP y te hasta di AVP mes cu ta decepciona den e partido na mando. Pues ta bon pa e politiconan di AVP tuma bon nota cu nan ta coriendo cu nan hendenan cu e tipo di politica aki di avestruz.

“Aruba ta pasando den momentonan hopi difícil, nos problemanan social ta birando cada biaha mas grandi, nos ensenjansa ta den crisis, salubridad publico y cuido di nos grandinan ta wordo neglisha, no tin trabou pa nos hendenan, y e MEGA DEBE ta sigi crese. Mi ta hasi un apelación na tur político, especialmente esnan di AVP, pa ban enfoca con pa hiba e pais aki padilanti, en bes di sigi bruha tera y crea desunion. E tiramento di lodo aki ta algo masha infantil. Como político, bo kier laga un legado. Ora bo wak bek atrás, bo kier por mira bo logronan. Awor bo tin e oportunidad pa scohe bo logro. Kiko bo kier mira ora bo wak bek riba bo carera político: cu abo como político a logra cosnan bon, of cu abo como político a logra mancha nomber di hende? Según mi e escohencia no ta difícil, ta e determinación so falta”, líder di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co