"E ultimo acto di agresion y destruccion cu a sosode siman pasa dilanti di e edificio di representacion di Hulanda na Aruba, no a sosode door di un persona cu ta actua riba su mes. E ta parti di un structura organisa di intimidacion, agresion, violencia y destruccion cu tin algun aña ta opera cu sosten politico di MEP. E no lo stop tanten cu MEP mes no kita su sosten y distancia su mes completamente di tur forma di intimidacion, agresion, menasa y destruccion door di tur hende, den tur forma. Tanten cu e persona y gruponan aki tin e sosten di MEP of di cualkier otro organisacion, nan lo sigui daña pa nos pais y pa nos tur." Den e forma cla y raspa aki, e lider di AVP, Rene Herde a bolbe expresa su mes publicamente contra di tur forma di intimidacion, amensa, agresion, violencia y destruccion aki na Aruba. Mescos ela haci cu e expresionnan instigado cu miembronan di MEP constantemente ta expresa den Parlamento di Aruba. Den e reunion di siman pasa pa aproba un ley pa stimula empresanan pa paga belasting riba ganashi y otro facilidadnan pa stimula economia, e miembronan di MEP a expresa nan mes masha agresivo y baho. E lider di MEP a hasta acusa un miembro di fraccion di AVP di a mata hende, faltando tur respet pa su mes y pa e organo di Parlamento.

DESTRUCCION
Den su declaracion Rene Herde a bolbe mustra cu e mes un hendenan cu a comete actonan di intimidacion, destruccion, agresion y violencia den pasado recien aki na Aruba, ta haciendo esey awor atrobe. Y den tur nan actonan, e hendenan aki a y ta haya sosten di e partido MEP y su lidernan. Ora a kima auto dilanti di Parlamento, ora a planea pa destrui edificio di Parlamento na september, ora a intimida Prome Minister di Aruba den su poco oranan liber y ora polis a sera hendenan cu a comete e actonan aki, e lidernan di MEP a sostene nan y a hasta yamanan heroenan.

ISOLA Y ELIMINA
Mientras cu partido AVP ta insisti pa nos tene nos mes na normanan di democrasia y respet pa tur hende, pa respeta organonan di nos pais manera corte di husticia y ministerio publico, e partido MEP ta sostene e gruponan di hende cu ta intimida, agredi, ofende, menasa y causa destruccion den nos pais. E unico forma pa elimina e tipo di violencia organisa aki ta door di kita tur sosten y isola nan den comunidad, te ora nan haci nan propio bida di agresion imposibel. Mester kita tur sosten pasobra nan ta contra tur cos bon cu nos pais ta para pe. Esun cu sostene nan agresion, intimidacion, menasa y destruccion, ta contra di Aruba!

Expresionnan haci den e articulo aki no necesariamente ta refleha opinion di ArenaPoliti.co