ORANJESTAD – Canando den e bario di Dakota diahuebs mainta, Prome Minister Mike Eman a wordo compaña pa funcionarionan di diferente departamentonan gubernamental. Un di esnan cu tur siman ta presente ta esnan di Gele Koorts en Muskieten Bestrijding (GKMB).

Na cada cas Prome Minister ta splica cu e funcionarionan di GKMB ta hunto cu ne pa asina duna nan cooperacion pa asina nan por controla pa criaderonan. Y awor mas cu nunca nan presencia, e mandatario ta splica e ciudadanonan, ta hopi importante. Dia prome di juni a inicia e temporada di horcan y aunke no a experencia nada di esaki ainda, por spera toch hopi mas yobida cu den e prome parti di aña den e periodo aki. E yobida pisa den pasado a causa hopi problema na Aruba cu criaderonan cu a trece Dengue cu a plama na gran escala na Aruba. Gobierno di Aruba y su departamentonan concerni a hiba campaña di conscientisacion hopi fuerte pa evita cu ta haya un problema di salud similar atrobe. Pesey for di momento cu Prome Minister a cuminsa cu Accion di Bario, a  percura pa funcionarionan di GKMB cana hunto cu ne den bario pa control den bario. Durante e accion di bario diahuebs mainta, e habitantenan di Dakota a duna masha bon cooperacion na e funcionarionan cu a controla hopi cas y a duna conseho riba aspecto cu lo por crea un peligro si no haci nada. Den tur e controlnan solamente un situacion di peligro so por a constata, cual ta un resultado hopi positivo.

Banda di GKMB, Serlimar tambe ta den bario pa duna un man na bisiñanan cu kier tira sushinan afo, pero pa motibo cu ta sushinan cu normalmente no ta bay den bari, Serlimar ta yuda cu esakinan. Tambe nan ta haci trabounan di limpiesa rond den e bario.

Bus di Salud su presencia tambe ta algo cu den Accion di Bario tin un rol importante, den e caso di Dakota a atende  mas di 50 persona. Esaki ta un cantidad mas grandi cu normalmente un consultorio di dokter di cas ta atende pa dia. Di e forma aki, Prome Minister Mike Eman y su Gobierno kier hiba e maneho pa cuido di salud mas serca den e barionan, y e cantidad di bishitanan ta demostra cu esaki ta wordo aprecia pa e habitantenan.

Expresionnan haci den e articulo aki no necesariamente ta refleha opinion di ArenaPoliti.co