ORANJESTAD – Pa ya algun tempo caba habitantenan di Klip tabata solicita bishita di Prome Minister Mike Eman hunto cu su ekipo di Accion di Bario. Porfin diahuebs mainta a cumpli cu e peticion. Su presencia tabatin un tono special como cu, naturalmente, Premier a sinti su mes inmediatamente na cas. Hunto cu ekiponan di Serlimar, DOW, Sociale Zaken y GKMB, a recore varios di e cayanan realisando trabounan di limpieza, control y asistencia na bienestar di e habitantenan.

Na final di e recorido, e mandatario a confesa cu tabata un momento yen di nostalgia ya cu un bes cu el a cana den e cayanan di e bario, di biaha el a sinti con el a bay bek den tempo pa recorda su añanan di infancia. E sentimento aki tabata reitera pa e caranan conoci cu a ricibi’ e den cada cas pa hunto recorda tempo di nan tempo. Famianan manera Celaire y Colina tabata sinta pafo ta ward’ e pa cumind’e y combersa.

E sentimiento di bon bini tabata evidente na tur e otro cas tambe. Sea ta pa elogia su vision pa cu nos pais, of pa dun’ e un ke otro recomendacion, habitantenan tabata contento di por tin e oportunidad di papia cu e Prome Minister directamente y na un manera personal.

E peticion mas comun ta pa acceranan cu pavers mescos Gabinete Mike Eman a haci na otro barionan rond di Aruba. Esaki ta un deseo cu e Premier ta haya cu ta na su luga mirando cu ta un bario cu tin mas di 20 aña sin haya un renobacion di su infrastructura. E mandatario a primitni di traha riba esaki hunto cu su colega, Minister Sevinger. Esey ta inclui tambe aspectonan di riolering cu mester mehoracion.

Algo notabel den e edicion aki di Accion di Bario ta e cantidad di persona cu a probecha di e oportunidad pa benta sushi y obhetonan afo y a prepara bon pa esaki. Adicionalmente, Serlimar a percura pa bay cu algun auto bieu cu tabata riba terenonan habri. Esaki a alegra e habitantenan mas mirando cu tabatin molester y miedo pa bestianan cu por tabatin.

Siman tras di siman Prome Minister Mike Eman y Accion di Bario ta yega na otro bario rond di Aruba y ta bay alagando su habitantenan mas contento di e apariencia di nan bisindario y mas orguyoso di tin Mike Eman como gobernante di nan isla.

Expresionnan haci den e articulo aki no necesariamente ta refleha opinion di ArenaPoliti.co