Accion di Bario sumamente exitoso 

ORANJESTAD – Habitantenan di Dakota a habri porta di nan cas pa ricibi Prome Minister Mike Eman cu mannan habri durante e Accion di Bario di diahuebs mainta.

For di oranan tempran di mainta Bus di Salud a yega riba e tereno unda antes tabata Bouwmaatschappij unda e habitantenan a cuminsa yega pa inscribi pa wordo atendi door di personal di Bus di Salud, mientrastanto hendenan a cuminsa aglomera riba e tereno puntrando “ki ora nos Minister President ta yega”.

Prome Minister Mike Eman a yega Dakota cu e meta di combersa cu habitantenan pa sa nan inkietudnan, conseho y ideanan pa mehoracion di nan bario y Aruba en general. Accion di Bario, banda di ta un oportunidad pa Prome Minister keda den contacto cu pueblo, tin vario otro actividad pa duna un man na e bario. Durante Accion di Bario, funcionarionan di varios departamento importante ta asisti pa duna man na e habitantenan en general. Aki por tuma como ehempel, SERLIMAR cu ta kita por ehempel sushi y onkruid indesea den e bario, GKMB cu ta probecha e ocasion pa controla criadero di sangura, duna habitantenan tips y informa nan di e peligernan, trahadornan social y Team BoBario. Hopi hende a sali for di nan cas pa spera e mandatario cu un saludo y abraso cordial, dunando palabranan yen di inspiracion manera “mi yiu no preocupa, nos ta cu bo y bo ta den nos oracion tur dia pa sigui cu e bon trabou,” sra. Bertha Tromp Vingal a bisa na momento cu el a ricibi e mandatario cu un abraso hopi fuerte cu a yena Prome Minister Eman di emocion.

Por constata e amor grandi cu tin pa e mandatario bou di e pueblo. Autonan tabata simplemente keda para riba caminda sperando e mandatario yega cerca pa saluda.

Den e bishita, e mandatario a wordo compaña pa diferente ciudadano di e bario, manera e conocido John Wowo, kende ta un fiel simpatisante di e Prome Minister Eman, kende a papia hopi di e union pa e pais. Y a recorda cu e ta cana den bario como Prome Minister di e pais aki.

E hospitalidad ricibi tabata asina grandi cu e caminata den e bario a bira mas largo cu normal p’asina duna atencion na tur esnan cu tabata yega cerca di e mandatario, sea cu palabranan di forsa of cu nan preocupacion en busca di solucion. “Nos a sinti e hospitalidad cu nos conoce di Dakota. Nos ta hopi contento cu e bario t’asina dedica y asina hopi hende a keda cas pa ricibi nos y intercambia di pensamento con miho nos por yuda e bario,” e mandatario a duna di conoce for di entrada di Caya Juancho Kock.

Expresionnan haci den e articulo aki no necesariamente ta refleha opinion di ArenaPoliti.co