ORANJESTAD – E reaccion semper positivo cu Prome Minister Mike Eman ta haya den su bishitanan rond di Aruba ta e manera mas directo y sincero di midi e aceptacion di maneho di Gabinete Mike Eman. Siman tras siman habitantenan den e diferente districtonan di nos isla ta aprecia e oportunidad unico cu nan tin di papia directamente cu e mandatario y expresa nan opinion y pensamentonan riba e areanan cu por mehora ainda den nan bario y pais. E siman aki durante Accion di Bario na Klip Oranjestad no tabata diferente, bisiñanan tabata entusiasma cu e encuentro y tabatin te hasta cu a sali di trabou un rato pa bin papia cu e mandatario.

Mayoria persona den e bario tin hopi tempo ta biba eynan. Tur hende conoce otro, pero tambe conoce Premier Eman y su famia, for di tempo cu e tabata mucha. E conexion aki a habri caminda pa un nivel ainda mas profundo di confianza y sinceridad. Banda di boga pa un infrastructura nobo, habitantenan djis kier sigui wak e mandatario continua cu e trabou cu e ta haciendo.

Esey ta e caso, por ehempel, di Selvinio Colina, un figura conoci pa hopi y un habitante orguyoso di e bisindario di Klip cu su 85 aña. Den e temporada aki di su bida, e ta hopi na cas, combersando cu bisiñanan y haciendo trabounan chikito paden y pafo di su cura. Refiriendo na Minister President Eman, Sr. Colina a bisa: “E sigui haci mas paso pa nos pueblo e ta hacie.”

Den e mesun caya di Sweelinckstraat a topa tambe cu Kevin Celaire, kende tin casi mita siglo bibando na Klip. “Min Pres ta un shon di hende y e ta haci su trabou bon,” el a expresa; algo cu su bisiña Petra Julen ta di acuerdo cune. Cu mas di shete decada den e bario, e señora a comenta cu Premier Eman “no ta haci cos pa mi so; e ta haci’e pa tur hende y ainda falta hopi cos bon pa e haci.” El a añadi cu e ta contento paso e mandatario ta un persona di curason grandi cu ta yuda unda cu e por yuda y si e no por, e ta bisa bo tambe.

Otro luga cu tabatin oportunidad di bishita den e recorido di diahuebs mainta tabata Cas di Machi. Aki Prome Minister a cuminda cada cliente presente, hopi biaha ricibiendo brasa, sunchi y principalmente bendicion di parti di e grandinan. Tambe a combersa cu e lider, Maria Cristina Gonzalez, kende a duna splicacion di e operacion di e cas di cuido di anciano.

Prome Minister Eman di su parti tabatin hopi elogio pa e trabou bunita cu dia aden y dia afo e grupo di persona aki ta haci pa brinda un miho calidad di bida na nos grandinan. Na su partida, Sra. Gonzalez a expresa su satisfaccion pa e bishita: “Mi ta hopi contento cu e Minister a bin cerca nos, el a haci tur hende den e cas feliz. Mi ta wak cu e ta haciendo hopi cos bon.”

Expresionnan haci den e articulo aki no necesariamente ta refleha opinion di ArenaPoliti.co