"E discucion riba e hotelnan "all inclusive" no mester ta riba e pregunta si ta bay regula esaki of no. E discucion mester ta con ta regula esaki pa logra dos cos: 1. Cu e industria di turismo ta sigui florece y crece mas awor y den futuro. 2. Cu henter nos comunidad ta sigui beneficia di e frutanan di turismo." Esey lo mester ta e essencia di e discucion. Ta trata di e forma con nos mester atende cu e retonan nobo den nos economia di turismo segun Rene Herde. E lider di e fraccion di AVP den Parlamento ta compronde cu e discucion a bira fuerte. Segun e ta trata di un asunto cu ta importante pa futuro di e calidad di turismo na Aruba. Pesey e ta compronde cu cada grupo ta defende nan interesnan. Pero tin un interes mas grandi cu esun di cada grupo. Esey ta e interes di henter nos comunidad. E interes di e 120 mil hende cu ta biba na Aruba y ta depende di e forsa y calidad di turismo pa nan pan di cada dia. E ta trata di e interes di tur e doñonan di e companianan cu a inverti hopi di nan placa den un hotel, restaurant, of cualkier otro compania den turismo. E ta trata di e interes di e mas cu 60 mil trahadonan y nan famia, di taxistanan, operadornan di tour-bus, di negoshinan grandi y chikito, cu ta depende di turismo. Ta trata di e entradanan cu mester bay pa gobierno pa paga maestronan di scol, pa sigura cuido medico, seguridad di polis y tur e otro tareanan cu gobierno tin pa nos comunidad. Rene Herde: "Ta cu e interes di tur e hendenan aki den mente, cu nos mester atende cu e tema importante aki. E echo cu tin un ley riba mesa, no kier men cu e discucion a caba. Al contrario. Awor e discucion por dirigi su mes riba un solucion. E minister a haci bon di presenta un forma di atende cu e problema. Pero tin mas experiencia y kisas mas solucion cu nos no a wak ainda. Ta pesey e fraccion di AVP ta reuni cu tur hende, tur organisacion of departamento pa haya sa kico nan tin na informacion, conocemento y solucion, pa usa tur esey den busca e miho solucion posibel."

MESTER ACTUA
Pa Rene Herde' mester actua pa sigura e dos metanan cu ela menciona: sigura cu turismo sigui florece y sigura cu tur hende cu ta depende di turismo, por sigui haya e beneficionan di turismo. Rene Herde': "E idea di djis sigui desaroyo di mercado internacional, no ta un opcion. Haci nada no ta un opcion. Tin mucho hopi ehempel cu esey ta nifica cu bo ta laga otronan determina e calidad di bo turismo. Tin mucho hopi interes pa nos pais den wega. Pesey haci nada, no ta un opcion! Loke nos tin cu haci ta busca e forma y e miho instrumentonan pa regula e industria di turismo - incluso e hotelnan di al inclusive, e apartamentonan y e condominionan - di tal forma cu nos ta sigura cu nos tur aki na Aruba ta sigui gosa di e beneficionan di un industria di turismo vibrante y cu ta sigui crece. Ta esaki nos fraccion ta busca. E miho solucion posibel pa nos pais."

Expresionnan haci den e articulo aki no necesariamente ta refleha opinion di ArenaPoliti.co