Minister Otmar Oduber ta anuncia cu te cu 9 di mei 2016 ta honra operacion existente 

Dialuna mainta Minister Otmar Oduber durante un rueda di prensa a anuncia oficialmente e maneho pa logra un combinacion saludabel di acomodacion na Aruba. Gobierno a informa e propiedadnan cu te cu 9 di mei 2016 tabata tin un operacion All-inclusive of un mescla di plannan cu nan operacion existente lo wordo honra. E anuncio aki no mester ta un sorpresa pa e propiedadnan mirando cu un proposicion legislativo a wordo manda dia 12 di april 2016 pa Parlamento incluyendo un sistema di permiso special pa hotelnan cu ta ofrece paketenan di All-inclusive pero cu ta cuadra cu e "vergunningstelsel". Den esaki ta stipula cu pa e propiedadnan cu no tin operacion All-inclusive cu nan por ofrece paketenan special di All-inclusive te cu un maximo di 20% di nan capacidad.

Aruba ta riba posicion number 1 entre 184 pais cu ta depende di Turismo. Un total di 88% di Aruba su GDP ta depende di Turismo y un 91% di e forsa laboral tin di haber directamente of indirectamente cu Turismo. Mirando e dependencia asina halto di Aruba riba e sector di Turismo,  ta un necesidad pa crea un maneho cu tin como interes general e bienestar di nos isla. Specialmente considerando e demanda creciente di proveedor di acomodacionnan y cu un interes halto pa e tipo di All-inclusive. E interes halto pa acomodacionnan di tipo All-inclusive, tanto den  construccion nobo of pa tuma propiedadnan existente over y comberti esakinan, ta motibo principal pa cu e cambio den ley.

Un analisis necesario a tuma luga unda a crea amiendanan legislativo cu e proposito  pa formula un balans saludabel den e portofolio di e acomodacionnan na Aruba y consecuentemente un contribucion sano na nos economia.

Contribucion na GDP tin un relacion directo inevitabel, na e mescla di acomodacion proponi. E ta representa un balans den e variacion di e tipo di acomodacion ofreci y na mes momento un maneho riba e posibel dominio di All-inclusive como e unico tipo di acomodacion. Considerando e vulnerabilidad di economia di Aruba, ta di vital importancia pa maneha e mescla di acomodacion riba nos isla. Pa e motibo aki mes Gobierno ta propone un sistema di permiso special pa hotelnan cu ta ofrece paketenan di All-inclusive pero cu ta cuadra cu e "vergunningstelsel". Na e momentonan aki e inventario di e cantidad di cambernan di e tipo All-inclusive ta na un 32% di e cantidad total. Kier inicia na e punto aki unda lo respeta locual tey caba te cu un maximo di 40% di e inventario di acomodacionnan na Aruba. Conforme e maneho di Gobierno pa respeta e situacion actual di e cantidad di acomodacionnan All-inclusive, e proposicion legislativo ta stipula cu pa haya un permiso pa opera un All-inclusive lo ta basa riba e "vergunningstelsel" existente, unda cu pa e fecha di 9 di mei 2016, pues na momento di e anuncio oficial, e propiedad cu tin e acomodacionnan tipo All-inclusive, tanto parcial of completo, lo haya un permiso pa esaki. E permiso lo ta vigente pa un duracion di 20 aña. Tur Hotel lo mester regla un permiso nobo y asina evita un expansion di propiedadnan All-inclusive riba nos isla. Gobierno ta para pa un balans saludabel di diferente tipo di acomodacion of di tipo di propiedadnan hotelero y no ta para pa un eliminacion completo di propiedadnan All-inclusive. Rason principal den esaki ta mirando e crecemento rapido di e mercado aki den e industria pa e siguiente 10 aña y adicionalmente ta mira un crecemento di e concepto di All-inclusive te hasta den e mercado vacacional luhoso. Ta importante pa Aruba como producto keda competitivo, creando un balans sin elimina Aruba como posibel destinacion of pa e turistanan cu ta mira opcionnan vacacional cu ta inclui acomodacionnan All-inclusive.  

Expresionnan haci den e articulo aki no necesariamente ta refleha opinion di ArenaPoliti.co