Gobierno di Aruba ta pensa riba interes general di Aruba ora papia di All-inclusive. 

Mientras ta wardando riba tratamento di E ley di All-inclusive den Parlamento di Aruba discusionnan ta continua. Diabierna ultimo Minister President Eman Conhuntamente cu Minister Otmar Oduber a duna un rueda di prensa pa aclaria un biaha mas e posicion di Gobierno pa cu e fenomeno creciente di acomodacionnan All-inclusive den nos inventario di cambernan di hotel riba nos isla. Na momento cu ta trata cu topiconan asina importante, Gobierno di Aruba semper ta mira na bienestar di interes general. Esaki ta inclui naturalmente e sector laboral. Banda cu nos isla economicamente ta depende 92% directamente of indirectamente di turismo, mas di 80% di Aruba su clase trahado ta depende di e mesun sector aki. Den Gabinete Mike Eman 1, Minister Oduber tabata encarga cu labor y no ta un secreto cu e sector aki ta keda un preocupacion p'e. Un punto cu ta keda bin padilanti durante e discusionnan ta e experiencia di e clase trahado den e hotelnan tipo All-inclusive. E mandatario di Turismo ta keda enfatisa di tin un bon relacion cu e hotelnan operando completamente All-inclusive riba nos isla y e ley aki lo no tin efecto riba nan, asina mes kier frena e fenomeno pa e inventario no sigui crece. Experiencia cu ta papia pa su mes ta mustra cu na momento cu un hotel ta transforma su mes den un hotel All-inclusive trahadonan ta wordo kita for di trabao na prome luga. Aruba a biba e tendencia aki na momento cu a haci Westin hotel un All-inclusive. Minister Oduber ta indica cu e tempo ey, danki Dios cu a pasa un ley pa proteha e trahadonan unda cu nan a logra gana nan caso dilanti mesa berde. E hotel All-inclusive na su turno mester a tuma e trahadonan over. A percura cu nan por lo menos a mantene un cupo di trabou, aunke no ta conoci si e aspecto di salario a keda mescos. Ta conoci si cu hotelnan All-inclusive ta opera cu un sistema cu casi e turista no mester biaha cu placa efectivo. Esaki sigur ta limita e tips pa servicio cu ta wordo duna unda cu mayoria di esnan cu ta traha den hotel ta depende di dje. Mayoria di e personanan cu ta traha den hotel tipo All-inclusive ta haya un salario minimo of menos pero ta logra a traves di nan tips yega na un salario mas decente. Turistanan den otro hotelnan ta recompensa e trahadonan cu tips pa nan bon servicio y amabilidad. Sinembargo den hotelnan All-inclusive tin algun Cadenanan Hotelero cu no ta ni permiti e tipo di recompensacion nan aki.

Segun e mandatario e interes general cu e ley aki ta salvaguardia ta inclui te hasta e hotelnan, cu na e momentonan aki, cu hopi logica, ta mira mas nan interes personal, nan inversion personal, pero ta lubida e totalidad cu ta loke ta crea un destinacion y sigur no unicamente e hotel.

Expresionnan haci den e articulo aki no necesariamente ta refleha opinion di ArenaPoliti.co