Despues di un bon relacion di 7 aña. 

Durante e rueda di prensa diabierna mainta den sala di prensa na oficina di gobierno Minister Otmar Oduber a indica di ta lamenta e posicion cu AHATA a tuma den hunta di supervision di ATA. "Como e Minister responsabel mi ta lamenta e decision aki profundamente debi cu den henter e trayectoria di en total 7 aña cu tur partido a sa di trata otro cu hopi respet." Durante e ultimo 7 añanan a traha cu otro cu hopi respet y cu a logra tambe hopi reto.
Sr. Oduber ta mustra riba e hecho cu den henter e discusion di e cambio di ley di All-inclusive por a tuma nota dicon e defensa di hotelnan a pone cu cierto momento tabatin atakenan directo mientras cu Gobierno na su turno semper a wanta portanan habri y ta sigui combersa y dialoga.
Sinembargo 4 reunion cu AHATA a keda cancela den e ultimo tres simannan y Gobierno no a nenga ningun reunion te dia di awe.
Tur e reunionnan cu tur gremio y tur organisacion a keda atendi unda cu abiertamente a combersa, dialoga y analisa e topico ampliamente. Minister Otmar Oduber ta lamenta e posicion tuma debi den e ultimo encuentro cu tabatin cu AHATA e Minister di Turismo a vocifera na AHATA  cu  por tin un diferencia di opinion awe, pero e importancia di e industria turistico ta bay hopi mas leu cu e discusion cu nos tin awe riba un ley cu gobierno ta pone pa interes general  di pais Aruba.  Sinembargo AHATA a bay over pa crea un situacion fastioso pa e instituto mas importante di Aruba y den un forma enblok a dicidi di bandona hunta di supervision di ATA sin ningun motibo valido.
Te dia di awe ni oficina di turismo ni Gobierno di Aruba a ricibi un motibo valido pa e decision di AHATA  pakico su tres miembronan a pidi retiro di e hunta di supervision di ATA, mientras por a nota den diferente medionan di comunicacion cu a publica varios speculacionnan. Asina mes Minister Otmar Oduber ta convenci cu lo mester por sigui traha hunto den futuro manera e profesionalnan den e industria a sa di haci te cu awor na e bienestar di pais Aruba

Expresionnan haci den e articulo aki no necesariamente ta refleha opinion di ArenaPoliti.co