Minister Otmar Oduber: Aruba presente na e acto historico di apertura oficial di ampliacion di e Canal di Panama
Minister Otmar Oduber y Director di Departamento di Relacionnan Exterior, Sr. Edwin Abath.
Den fin di siman a tuma luga e acto historico, unda oficialmente a inaugura e ampliacion di e canal di Panama. E meta di e Gobierno di Panama ta pa desaroya Panama den un hub logistica di Merca. E canal lo sirbi un asina yama ' shortcut ' di 2 pa 3 siman pa barconan di carga yega Latino America y Merca. Den esaki Logistica y Sector Maritimo Hulandes a sigui e desaroyonan aki hopi di cerca.
Expansion di e canal na Panama ta crea un desaroyo economico cu ta cuadra perfectamente cu e vision di Aruba di ta e hub entre Europa y Merca. Den cuadro di esaki mes ta di suma importancia cu nos ta bon representa. Durante e acto oficial diadomingo na Panama Minister di Turismo Transporte Sector Primario y Cultura Sr. Otmar Oduber acompaña pa Director di Departamento di Relacionnan Exterior Sr. Edwin Abath a representa nos dignamente. Reino Hulandes a percura pa ta presente unda entre Vicepremier Lodewijk Asscher di Hulanda y tambe Prome Minister di Curaçao, Bernard Whiteman ta presente. Cu e expansion di e Canal di Panama por spera un amplio desaroyo y oportunidadnan economico den e region di Centroamerica. Reino Hulandes sigur lo no kier niun oportunidad pasa bay sin explora esakinan. Den cuadro di esaki Vicepremier Asscher dialuna mainta lo reunie cu oficialnan di Panama y tur e companianan hulandes estableci na Panama unda lo hiba un discucion riba entre otro desaroyo den Logistica y e Sector Maritimo di Panama y con companianan Hulandes por probecha di henter e desaroyo aki. No mucho tempo pasa Minister Oduber tabata na Panama pa hiba combersacionnan cu su homologo di Panama, Curaçao y di Colombia riba e posibilidadnan pa crea rutanan nobo y atractivo pa liñanan crucero. Liñanan crucero mas i mas ta mira destinacionnan den sur di Caribe como leu. Aruba mester sa di keda un destinacion atractivo pa e liñanan crucero y den e esfuerso aki a tene man cu destinacionnan den nos region manera entre otro Panama pa asina crea rutanan atractivo. Ta di suma importancia pa Aruba mantene e bon relacion cu Gobierno di Panama mirando e tantisimo oportunidadnan economico cu e relacion lo por tin na beneficio di nos isla.
Expresionnan haci den e articulo aki no necesariamente ta refleha opinion di ArenaPoliti.co