AWOR PUEBLO TA COMPARTI DEN PROGRESO, CON CHIKITO CU E POR TA.  

Un di e diferencianan grandi cu pueblo a ripara entre gobiernonan di MEP y gobiernonan di AVP, ta cu den bon y den mal tempo, gobiernonan di AVP ta parti loke tin cu Pueblo.   Pasobra ta pa Pueblo y Pais gobierno ta traha. No pa amigo y famianan! Gobierno di AVP ta parti tur cos, con chikito cu e por ta. Den tempo di MEP, pa añanan largo Pueblo a wordo lubida. Ta ora di ranca placa for di saco di Pueblo so tabata corda cu Pueblo tey. Anto segun MEP, esaki tabata e miho añanan di Aruba!!!

Den e ultimo añanan Aruba a conoce adelanto den economia: turismo a carga nos pais tempo cu e refineria tabata sera. Den e añanan cu a pasa a wak con economia a sali for di e abismo cu MEP a bay lagu'e aden y crece poco poco. Gobierno di AVP -conciente di e situacion cu Pueblo tabata biba aden - mes ora a cuminsa parti e progreso cu Pueblo, sin falta niun otro responsabilidad cu gobierno tin pa maneha nos pais. A aumenta e penisoen di behez,  debolbe e indexering na trahadornan, a duna trahadornan di gobierno y maestronan di scol un prima adicional, a aumenta e onderstand y a baha prijs di awa y coriente. Awor den lus di e adelantonan cu tabata tin e aña aki, gobierno di AVP ta bolbe parti e loke tin cu Pueblo. Entrante januari awor e pensioen di behez ta bolbe subi. E salario minimo ta bolbe subi. E onderstand ta bolbe subi. E prijs di coriente ta bolbe baha pa casnan di famia y pa comercio. E prijs di recohe sushi di Serlimar ta baha pa e grupo di famianan cu un entrada bou di 2500 florin. Nan ta bay paga 10 so. Studiantenan cu tin un fiansa pa estudio pa paga bek, por kita te 10 mil florin pa aña for di nan entrada pa belasting. Tur ta adelantonan chikito, pero ta mustra cu AVP ta traha pensando riba Pueblo y ta parti loke tin cu Pueblo. Con chikito cu e por ta. Di otro banda un deduccion di 10 mil florin pa aña pa studiantenan cu tin cu paga nan debe di estudio, no ta co'i chikito! E reduccion di prijs di coriente cu 15% y pa didos biaha, tampoco ta cos chikito! Tur esaki ta formanan cu directamente ta toca e forsa di compra di henter pueblo! Esaki ta e forma cu gobierno di AVP ta comparti e progreso cu henter Pueblo. Pasobra "ora Aruba bay dilanti, tur hende mester bay dilanti".

E refineria ta bolbe habri y ta priminti di crea cuponan di trabou, stimulacion di economia local y mas entrada pa famia y gobierno.

Expresionnan haci den e articulo aki no necesariamente ta refleha opinion di ArenaPoliti.co