Rene Herdé: Mas cu conseho financiero. Contribucion pa un discucion racional riba conseho financiero!
E discucion di si CFT mester bin of no a bira un discucion politico enbez di un discucion di con pa haya miho conseho, tene control y duna responsabilisacion riba maneho financiero di nos pais. E discucion riba CFT no a keda entre gobierno di Aruba y Hulanda. Ela bira uno entre MEP y PDR cu ta na fabor di CFT y su medidanan. Na otro banda AVP cu kier hiba un maneho financiero, economico y social pa mantene crecemento economico, sigui crea cupo di trabou y mehora forsa di compra. AVP ta na fabor pa reforma aparato di gobierno y baha gastonan publico, pero na un forma cu no ta crea inseguridad pa servicionan di gobierno of pa empleo di trahadornan. E ehempel di con CFT a traha na Corsow y Sint Maarten ta duna motibo pakico AVP no kier e rol cu CFT kier hunga. Cifranan real ta mustra cu apesar di e saneamento di debe di Corsow y Sint Maarten, bou di CFT e desaroyo economico, creasion di cuponan di trabou, e nivel di inversion y e desaroyo social a keda atras. E meta y maneho di gobierno Hulandes di austerisa pisa, di kita hende foi trabou sin wak e consecuencianan, ta bisto den e maneho y consehonan di CFT. AVP no kier un CFT asina. AVP ta na fabor di un organo independiente pa analysa y duna conseho riba maneho financiero y economico di nos pais cu ta yuda soluciona problema. Mescos cu semper Aruba tabata tin un organo independiente y critico riba tereno di legal (= Raad van Advies). Di e mes un forma AVP kier un organo – critico, independiente di politica, cu experticio incuestionabel – pa analysa y duna conseho riba tereno financiero y economico.TAREA Y TERENO
E tarea di e organo independiente aki mester ta mas cu solamente analysa entrada y gasto di gobierno y bisa con pa drecha esaki. Gobierno no ta para los di comunidad y economia di nos pais. Kico cu gobierno haci of keda sin haci ta afecta economia, mercado laboral, inversion y bida social di nos pais. Kier men cu un organo cu ta djis wak entrada y gasto di gobierno, sin wak e consecuencia di esaki y sin wak e rol di gobierno den un comunidad chikito, pa stimula economia y mehora calidad di bida pa tur hende, no ta traha realistico. Wak e consecuencianan di e trabou di CFT na Corsow y Sint Maarten.
E organo cu AVP kier ta un FISCAL COUNCIL manera tin na hopi pais y den e forma cu IMF ta propone. E tarea di un organo asina ta pa analysa tur cifra financiero, economico, laboral y social y pa conseha gobierno riba su maneho financiero teniendo cuenta cu e consecuencianan pa economia, empleo/desempleo, calidad di servicio di gobierno y su consecuencianan pa bida di tur sector den comunidad. Un organo manera AVP kier ta uno cu ta contribui cu analysisnan critico y cu ta sigui desaroyonan den pais continuamente y hala atencion di gobierno ki ora cu ta necesario. E mester ta un organo cu ta presenta diferente scenario di maneho y nan consecuencianan. E ta un organo cu ta presenta alternativanan pa solucion. Esaki ta un organo cu ta contribui na maneho. No uno cu ta crea inseguridad. AVP kier un organo independiente, critico, cu bista amplio riba desaroyo di comunidad y cu ta haci mas cu solamente check cifranan.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...