Fraccion di AVP ta contra di CFT. E motibo y argumentonan ta racional. En todo caso e motibo y arumentonan no ta di indole di "interes politico" of sentimental. Nos pais no tin nada na e tipo di argumento aki! Ata aki algun di e argumentonan di AVP:

CONSEHO Y CONTROL
AVP ta na fabor di normanan financiero y economico realistico, conseho y control (= adverti y critica) pa maneho y desicionnan di gobiernonan riba tereno financiero, economico y social. AVP kier pa e normanan financiero y economico ta instrumentonan importante. Pesey AVP kier ancra esakinan den Constitucion y den leynan cu ta obliga gobiernonan, awor y den futuro, pa tene nan mes na e normanan aki. AVP ta na fabor di un instituto of organo oficial y independiente, cu tambe ta ancra den ley, cu expertonan incuestionabel, cu ta encarga cu e trabou di analisa, conseha, controla y evalua e maneho di gobierno riba e terenonan finansa, economia, mercado laboral, enseñansa, desaroyo socio-economico y proyectonan di gobierno. Awendia no tin pais cu kier bolbe cay den a problemanan financiero, economico y social cu paisnan grandi y chikito a conoce den ultimo decada. Paisnan cu di berdad kier yega na finansa publico balansa y sostenibel, na un economia cu ta crece y crea trabou, na un desaroyo socio-economico balansa y sostenibel, ta crea un instituto independiente y profesional pa conseha, controla y evalua e maneho. Pa AVP no tin discucion si mester tin un instituto asina of no. Nos ta na fabor di conseho y control manera tin caba riba tereno legal y di presupuesto den forma di Raad van Advies (=Conseho Consultativo)

CFT OF FISCAL COUNCIL
AVP kier crea su propio Fiscal Council cu lo funciona mes independiente y profesional cu Raad van Advies a y ta funciona for di 1986. E Fiscal Council mester ta independiente y profesional y e mester traha a base di e encargo cu Constitucion y ley ta prescribi. E Fiscal Council mester funciona sin niun otro 'agenda' of meta politico of particular. E Fiscal Council mester tin e proteccion legal y espacio financiero pa e por funciona independiente y critico den ehecucion di su tarea. E Fiscal Council no mester ta encarga cu solamente "percura pa finansa publico ta na orden". E mester haci esaki den e cuadro mas realistico di e desaroyo economico desea, creasion di trabou necesario y desaroyo social balansa di henter comunidad. Pa e areanan aki tambe mester tin normanan bon fiha. E tarea amplio aki AVP ta wak como esun di e Fiscal Council.

Esaki ta tambe parti di e motibonan pakico AVP ta contra CFT. CFT no ta independiente. E ta wordo guia door di gobierno Hulandes. CFT tin yen di experto cu masha hopi experiencia den "balansa bukinan di finansa", pero CFT no tin ningun atencion pa desaroyo economico of social di comunidad. E tarea di CFT ta misquino: wak pa elimina deficit y debe mas lihe posibel sin tene cuenta cu desaroyo economico, inversion of desaroyo social di comunidad a medio y largo plazo. CFT a wordo crea pa sanea finansa publico di Corsow y St Maarten despues cu a kita e debe di e dos paisnan aki. ("Schuldsanering") Pa haci esaki Corsow y St Maarten a aproba e Ley di Reino cu a duna CFT su base legal. Aruba a scohe na 2010 pa no adopta e Ley di Reino cu ta regla CFT. Aruba no a pidi ni haya "schuldsanering" tampoco. Aruba a scohe pa un otro maneho financiero y economico. Cinco aña despues di introduccion di CFT na Corsou y Sint Maarten e crecemento economico mas halto cu Corsow a logra ta 0.8%. Den e mes un periodo di cinco aña ey, sin "schuldsanering", credito na interes abou y sin CFT, economia di Aruba a bay di -13% pa +3.9% na 2013. Mientras ta austerisa sin fin bou control di CFT, economia di Corsow a stagna, desempleo a keda halto, inversionnan ta keda abou y desaroyo social ta keda un problema. Ta esaki AVP kier preveni pa sosode cu Aruba. Pesey AVP ta na fabor di un otro instituto pa duna conseho y haci control. Pesey AVP ta na fabor di un otro maneho financiero y economico cu si ta duna resultado manera a sosode den ultimo cinco aña!

Expresionnan haci den e articulo aki no necesariamente ta refleha opinion di ArenaPoliti.co