"Oposicion ta haya cu mester aumenta belasting, manera BBO, pa gobierno aumenta su entrada lihe. Pero ora gobierno anuncia formanan pa haya entrada, manera e idea di un cobransa chikito riba transaccionnan financiero, e mes un oposicion ta grita cu ta tuma medida pisa. Oposicion ta sclama cu gobierno ta gasta placa, pero ora gobierno baha gasto, oposicion ta grita cu ta tuma medida. Oposicion ta bisa cu gobierno a gasta miyonnan di florin na 'consumo' y ta critica esaki. Pero den nan sabiduria nan no a realisa cu esaki ta e placa cu a bay pa mehora forsa di compra di pueblo. Nan no tabata kier pa gobierno di SVP duna pensionadonan un aumento chikito den tempo di crisis cu e "reparatietoeslag". Nan no a realisa cu e placa extra aki a bay pa e mas cu 40 mil trahador den sector priva cu ta gana salario minimo. Nan no a realisa cu esaki ta e placa cu a bay pa e indexering pa empleadonan publico y maestronan di scol cu MEP a nenga pa 7 aña. Oposicion a critica e deficit halto den presupuesto na 2014, pero no kier admiti cu e placa adicional a bay pa fondo di pensioen di trahadornan y maestronan di scol y pa cubri gastonan di cuido medico di AZV. Oposicion ta sostene e forma abrupto cu CFT kier pa gobierno impone medida riba pueblo, pero nan no ta realisa cu esey lo stagna nos economia y creasion di trabou, manera a sosode entre otro na Corsow. Awor oposicion ta buscando tur forma pa critica e presupuesto 2015 atrobe, apesa di cu e cifranan ta cumpli cu e cuadro financiero 2014-2018 y e maneho gradual pa restructura finansa publico ta dunando resultado concreto. Un bon ehempel di e resultado aki ta con gobierno di AVP a rescata e fondonan di pensioen cu tabata casi bancarota. Wak con a sigura e pensioen di mas cu 20 mil pensionado di awe y a sigura tur pensionado den futuro un miho entrada cu e pensioen adicional. Djis wak con a baha gastonan di cuido medico sin mishi cu e pakete di seguro medico. Aunke e trabou no ta cla ainda, e ta bayendo bon. Esey ta e frustracion di oposicion. Pesey awor nan tin cu busca pieuw pa piki den e presupuesto."E lider di e fraccion di AVP a bisa esaki den fin di siman despues di e tende y lesa algun di e critica di oposicion riba e presupuesto.

RIBA BON CAMINDA
Segun Rene Herde' e realidad ta cu e proceso di restructuracion di finansa publico ta bayendo bon. IMF, CFT y Raad van Advies ta reconoce esey. Nan preocupacion ta cu nan no ta haya cu gobierno mester haci mas y mas lihe pa logra su metanan den e tempo cu nan lo desea. Nan ta pensa asina en particular pasobra e administracion financiero di gobierno no tin e capacidad necesario pa haci tur loke mester haci. Door di esey nan no sa si gobierno lo logra di haya e entradanan cu tin proyecta y si lo logra baha e gastonan manera planea. Esey ta e duda cu tin serca e instancianan aki. Pesey, segun Rene Herde' AVP a urgi gobierno aña pasa pa mehora e administracion financiero di gobierno lihe. Rene Herde: "Nos ta contento cu minister di finansa a presenta plannan pa mehora e administracion financiero. Entre otro door di mas training pa e personal y automatisacion di majoria di e trabounan financiero den gobierno. Nos preocupacion ta cu esaki a tarda mucho. Mehoracion administrativo tabata un condicion pa e restructuracion financiero. Awor ela bira un condicion critico. Pa nos e tin e prioridad mas grandi awor aki. Sin esaki hasta e restructuracion di belasting ta core peliger di no duna e resultado cu a planea. Durante di tratamento di presupuesto e necesidad pa tuma desicion mas lihe y ehecuta e maneho efectivamente ta bay haya hopi atencion. No e puntonan cu oposicion ta busca." Asina Rene Herde' a splica.

Expresionnan haci den e articulo aki no necesariamente ta refleha opinion di ArenaPoliti.co