E costonan di e aparato di gobierno ta mas cu mitar di tur e gastonan di gobierno. (+/- 700 miyon florin) E servicio di departamentonan na pueblo ta laga di desea. E proceso di trabou, di tuma desicion, di actua y di comunica ta mucho poco poco. Mucho hopi documento ta bay perdi. Reglanan ta cambia tur siman. Na hopi departamento pueblo ta sinti cu ta un fabor e empleadonan ta haci pueblo. Siendo cu ta PUEBLO ta esun cu mester wordo sirbi manera un rey. Mucho hopi biaha pueblo ta sinti cu reglanan no ta wordo aplica mescos den tur caso. Esaki a crea duda serca pueblo den e aparato di gobierno.

MOTIBONAN PA CAMBIO
Esaki ta un resumen cortico di e critica cu ta haya di pueblo riba e aparato di gobierno. For di punto di bista di pueblo e cambio di tur esaki mester a sosode hopi dia caba. No tin motibo pa hustifica costonan asina halto na e aparato di gobierno, pa haya un servicio cu den mucho hopi caso ta laga di desea. For di punto di bista di finansa publico, e costo di mas cu 50% di tur e gastonan di gobierno pa e aparato, ta mucho halto. Mester trece cambio pa gobierno por inverti mas for di presupuesto den nos pais. Pasobra e total di presupuesto no ta bay subi. Si kier haci mas, e mester bin di den e presupuesto. E mester bin di aumenta eficiencia. Haci mas cu e mes un placa. E impresion cu tin malgastamento di placa den e aparato pa motibo di ineficiencia, mal comunicacion, proceduranan antigua y reglanan cu nos ta sirbi nos comunidad mas, mester wordo corigi.

SOLUCION
Tin hopi pais cu tin e mes un problema aki y tin diferente forma pa atende cu e reforma di e aparato. Un di e instrumentonan mas usa ta pa automatisa hopi di e procesonan di gobierno y standardisa trabou, regla y proceduranan. E no ta nifica cu mester kita hende for di trabou. E ta nifica si cu hende ta bay traha den forma diferente. Cu tin proceduranan di trabou mas eficiente y reglanan cu tin sentido. E ta nifica cu trahadornan ta bay haci otro trabou. Manera control riba ehecucion di leynan cu ta algo cu tin falta didje. Trabounan rutinario ta wordo haci door di sistemanan automatisa. Clientenan mes ta haci mas via computer/internet. Hopi servicio ta wordo haci via internet. Un bon ehempel ta e sistema di belasting nobo cu gobierno a anuncia y cu lo wordo introduci na cuminsamento di 2016. Den e sistema aki hopi papel ta wordo elimina. Entrega di belasting ("aangifte") por ehempel ta wordo haci via internet. No lo tin retraso mas den controla papelnan di belasting. Trahadornan lo dedica mas tempo na control riba cumplimento. Esaki so lo reduci gasto y aumenta entrada di gobierno na tempo. E servicio na hopi departamento lo por wordo mehora, door di cu tin menos 'bay-bin' cu papel y mas tempo pa scucha y atende cu e clientenan. Hefenan di departamento tambe lo tin mas tempo pa pone na guia, supervisa e servicio y sigura cu tur cliente ta wordo sirbi mes bon. Awor aki hefenan ta mucho ocupa ta soluciona problemanan cu surgi pa motibo di e ineficiencia cu tin. Asina tIn hopi motibo pa restructura e aparato di gobierno, pasobra tur hende, pueblo, trahadornan y gobierno ta beneficia di e renobacion. Awor ta e tempo pa haci e cambionan aki!

Expresionnan haci den e articulo aki no necesariamente ta refleha opinion di ArenaPoliti.co